தமிழ் திரையுலகில் எவர்கிரீன் கல்ட் கிளாசிக் திரைப்படமாகக் கொண்டாடப்படும் ‘அன்பே சிவம்’ திரைப்படம் வெளியாகி பல ஆண்டுகள் கடந்தாலும், இன்றுவரை சினிமா ரசிகர்களால் பேசப்பட்டு வருகிறது. இந்நிலையில், இப்படத்தின் இயக்குநரான சுந்தர் சி இப்படத்தின் உருவாக்கம், அதன் வணிக ரீதியான தோல்வி மற்றும் தனது திரைப்பயணம் குறித்த பல சுவாரசியமான உண்மைகளை வெளிப்படையாகப் பகிர்ந்துள்ளார்.
சினிமா துறை பற்றி நன்கு அறிந்த எவரும் இத்திரைப்படம் எனது இயக்கத்தில் வெளியானது என்று கூற மாட்டார்கள் என்று சுந்தர் சி தெரிவித்துள்ளார். ஒருவேளை அப்படம் அப்போது தியேட்டர்களில் வணிக ரீதியாக வெற்றியடைந்திருந்தால், தான் இதுபோன்ற பல வித்தியாசமான கதைகளைக் கொண்ட படங்களை இயக்கியிருக்க முடியும் என்று அவர் குறிப்பிட்டார். ஆனால், அப்படம் வெளியான காலத்தில் தனக்கு ஏற்பட்ட தனிப்பட்ட நிதி இழப்புகளை அவர் நினைவுகூர்ந்தார்.
இன்று இப்படியொரு தரமான படம் வந்தால் மக்கள் அதைக் கொண்டாடுவார்கள் என்று பலரும் கூறுகிறார்கள். ஆனால், இப்போதே இப்படம் வந்தாலும் மக்கள் அதைப் புறக்கணித்து பிளாப் ஆக்கிவிடுவார்கள் என்று அவர் சுட்டிக்காட்டினார். மேலும், படம் வெளியாகி ஐந்து முதல் பத்து ஆண்டுகள் கடந்த பின்னரே, “என்ன ஒரு அற்புதமான படம்! அப்போதுதான் மக்களின் ரசனை சரியில்லை” என்று அனைவரும் பேசுவார்கள் என்றும், இந்த நிலை எப்போதும் மாறாது என்றும் அவர் கூறினார்.
உண்மையான சினிமா கலைஞர்களும், தொழில்நுட்ப வல்லுநர்களும், கமல்ஹாசன் மற்றும் மாதவன் போன்ற நடிகர்களும் தன் உழைப்பை அறிவார்கள் என்று அவர் தெரிவித்தார். இப்படத்தில் உலகநாயகன் கமல்ஹாசன் பொதுவுடைமைக் கொள்கையைக் கடைப்பிடிக்கும் ஒரு கம்யூனிஸ்ட்டாகவும், நடிகர் நாசர் ஒரு நிலப்பிரபுவாகவும் எதிர்எதிர் துருவங்களாக நடித்திருந்தனர். இரண்டு மாறுபட்ட கருத்துக்களைக் கொண்ட கதாபாத்திரங்களை மோத விடுவதுதான் சினிமாவின் அடிப்படை விதி என்றும் சுந்தர் சி விளக்கமாகக் கூறியுள்ளார்.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
