கோலிவுட்டின் தற்போதைய ஹாட் டாபிக், சிலம்பாரசன் டிஆர் மற்றும் இயக்குநர் வெற்றிமாறன் கூட்டணியில் உருவாகி வரும் ‘அரசன்’ படத்தின் படப்பிடிப்பு நிறுத்தப்பட்டது தான். கலைப்புலி எஸ். தாணு தயாரிப்பில் சென்னையில் விறுவிறுப்பாக நடந்து வந்த இந்தப் படப்பிடிப்பு, பழைய பண விவகாரம் தொடர்பாகத் தயாரிப்பாளர் சங்கம் மற்றும் பெப்சி (FEFSI) அமைப்புகளின் தலையீட்டால் திடீரென முடங்கியுள்ளது. இது சிம்பு ரசிகர்களிடையே அதிர்ச்சியை ஏற்படுத்தியுள்ள நிலையில், அவரது தந்தை டி.ராஜேந்தர் இந்த விவகாரத்தில் அதிரடியாகக் களமிறங்கியுள்ளார்.
இந்த விவகாரம் குறித்து ஆவேசமாகப் பேசியுள்ள டி.ராஜேந்தர், ‘வெந்து தணிந்தது காடு’ படத்தின் தயாரிப்பாளர் ஐசரி கணேஷ் தொடர்ந்த வழக்கில் நீதிமன்றம் ஏற்கனவே தெளிவான தீர்ப்பு வழங்கிவிட்டதாகக் குறிப்பிட்டுள்ளார். “ஐசரி கணேஷ் கொடுத்த அட்வான்ஸ் தொகை சிலம்பரசனுக்கே சேரும் என்று நீதிமன்றம் தீர்ப்பு நகல் கொடுத்துள்ளது. அந்த ஆவணங்கள் எங்களிடம் உள்ளன. அப்படி இருக்கும்போது, சட்டத்தைத் தன் கையில் எடுத்துக்கொண்டு படப்பிடிப்பை நிறுத்துவது எந்த விதத்தில் நியாயம்?” என்று அவர் கேள்வி எழுப்பியுள்ளார்.
நடிகர் சங்கம் இந்த விவகாரத்தில் மௌனம் காப்பது ஏன் என்று டி.ஆர் தனது கண்டனத்தைப் பதிவு செய்துள்ளார்.
ஒரு தயாரிப்பாளருக்காகத் தயாரிப்பாளர் சங்கம் துணை நிற்கும் போது, ஒரு நடிகருக்காக நடிகர் சங்கம் ஏன் குரல் கொடுக்கவில்லை என்று அவர் கேள்வி எழுப்பியுள்ளார். மேலும், சட்டசபை தேர்தல் நடக்கவிருக்கும் இந்த நேரத்தில், நீதிமன்ற உத்தரவையும் மீறி படப்பிடிப்பைத் தடுப்பது முறையற்ற செயல் என்றும் அவர் விமர்சித்துள்ளார். இந்த விவகாரம் தொடர்பாக மிக விரைவில் பத்திரிகையாளர்களைச் சந்தித்து அனைத்து ஆதாரங்களையும் வெளியிடப் போவதாக அவர் அறிவித்துள்ளார்.
அரசன் திரைப்படம் தீபாவளிக்கு வெளியாகும் என எதிர்பார்க்கப்பட்ட நிலையில், இந்தத் தடை படத்தின் ரிலீஸைப் பாதிக்குமா என்ற கவலை எழுந்துள்ளது.
வெற்றிமாறன் இயக்கத்தில் விஜய் சேதுபதி, பிரியங்கா மோகன் எனப் பெரிய நட்சத்திரப் பட்டாளமே இந்தப் படத்தில் நடித்து வருகின்றனர். அனிருத் முதன்முறையாக வெற்றிமாறன் படத்திற்கு இசையமைக்கிறார். வடசென்னை உலகத்தின் ஒரு பகுதியாக இந்தப் படம் உருவாகி வரும் நிலையில், இந்தச் சிக்கலைச் சுமூகமாகத் தீர்க்க தயாரிப்பாளர் கலைப்புலி எஸ். தாணு பேச்சுவார்த்தையில் ஈடுபட்டுள்ளார். விரைவில் படப்பிடிப்பு மீண்டும் தொடங்கும் என எதிர்பார்க்கப்படுகிறது.
