தமிழ் திரையுலகின் முன்னணி நடிகர் ரவி மோகன் (Ravi Mohan) மற்றும் அவரது மனைவி ஆர்த்தி இடையேயான பிரிவைச் சுற்றிப் பல்வேறு விவாதங்கள் நடந்து வருகின்றன. இதில் ரவி மோகனின் தோழியான பாடகி கெனிஷா பிரான்சிஸ் (Kenisha Francis) மீதும் பல விமர்சனங்கள் முன்வைக்கப்பட்டன. இந்நிலையில், தனது மௌனத்தைக் கலைத்துள்ள கெனிஷா, ஒரு உருக்கமான வீடியோவை வெளியிட்டுத் தன் மீதான குற்றச்சாட்டுகளுக்குப் பதிலடி கொடுத்துள்ளார். “மற்றொருவரின் குடும்பத்தை நான் ஒருபோதும் கெடுக்க நினைக்க மாட்டேன்” என அவர் அந்த வீடியோவில் மிகத் தெளிவாகக் குறிப்பிட்டுள்ளார்.
தனது தனிப்பட்ட வாழ்க்கையில் தான் கடந்து வந்த மிகக் கடினமான பாதையைப் பற்றி கெனிஷா அந்த வீடியோவில் விரிவாகப் பேசியுள்ளார். தனக்கு 4 வயதிலேயே பாலியல் வன்கொடுமை நடந்ததாகவும், 18 வயதில் நடந்த திருமணத்திற்குப் பிறகு தனது கணவர் 10-க்கும் மேற்பட்ட பெண்களுடன் உறவில் இருந்ததாகவும் அவர் வேதனையுடன் தெரிவித்தார். மேலும், கணவரின் உடல் ரீதியான தாக்குதலால் தனது கருவில் இருந்த குழந்தையை இழந்தது, பெற்றோரின் மறைவு எனத் தனது வாழ்க்கையே ஒரு தொடர் போராட்டமாக இருந்ததாகக் கூறி அவர் கண்ணீர் மல்கியுள்ளார். இவ்வளவு வலிகளை அனுபவித்த தான், இன்னொரு பெண்ணின் வாழ்க்கையைப் பாதிக்க ஒருபோதும் நினைக்க மாட்டேன் என அவர் கூறியுள்ளார்.
ரவி மோகன் குறித்துப் பேசிய கெனிஷா, அவர் தனது முடிவுகளைத் தானே எடுக்கும் ஆற்றல் கொண்டவர் என்றும், அவர் ஒரு குழந்தை அல்ல என்றும் தெரிவித்தார். ரவி மோகனின் குடும்பப் பிரச்சினைக்கும் தனக்கும் எந்தத் தொடர்பும் இல்லை என்பதைத் திட்டவட்டமாகக் கூறிய அவர், தன்னை விமர்சிப்பவர்கள் தனது கடந்த காலத்தைச் சற்றுத் திரும்பிப் பார்க்க வேண்டும் எனக் கோரிக்கை விடுத்துள்ளார். ஒரு மனிதராக ரவி மோகனுக்குத் தான் ஒரு தோழியாக மட்டுமே ஆதரவு அளிப்பதாக அவர் விளக்கமளித்துள்ளார். இந்த வீடியோ தற்போது சமூக வலைதளங்களில் பெரும் பரபரப்பை ஏற்படுத்தியுள்ளதுடன், கெனிஷாவிற்கு ஆதரவாகவும் எதிராகவும் பல கருத்துக்கள் பதிவிடப்பட்டு வருகின்றன.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
