மலையாள சூப்பர் ஸ்டார் மோகன்லால், சட்டவிரோதமாக வனவிலங்கு பொருட்களை வைத்திருந்ததாகத் தொடரப்பட்ட வழக்கைச் சந்தித்து வரும் நிலையில், தற்போது அவர் தனது வசம் இருந்த தந்தங்களை வனத்துறையிடம் அறிவித்துள்ளது திரையுலகில் பரபரப்பை ஏற்படுத்தியுள்ளது.
கேரள வனத்துறையின் ‘பொது மன்னிப்புத் திட்டத்தின்’ (Amnesty Scheme) கீழ், தனிநபர்கள் தங்களின் வசம் இருக்கும் வனவிலங்கு சார்ந்த பொருட்களை முறைப்படி அறிவிக்க அவகாசம் அளிக்கப்பட்டது. இதைப் பயன்படுத்திக்கொண்ட நடிகர் மோகன்லால், கொச்சியில் உள்ள மலையாற்றூர் வனத்துறை அலுவலகத்தில் 10 யானைத் தந்தங்கள் மற்றும் 13 தந்தச் சிலைகள் இருப்பதாக அறிவித்துள்ளார். ஏற்கனவே அவர் நான்கு தந்தங்கள் இருப்பதாகக் கூறியிருந்த நிலையில், தற்போது கூடுதலாக ஆறு தந்தங்கள் இருப்பதை வெளிப்படுத்தியுள்ளார்.
இந்த 13 தந்தச் சிலைகளில் கிருஷ்ணர், ராமர் மற்றும் திருப்பதி பாலாஜி சிலைகள் அடங்கும் என்றும், இவற்றின் மொத்த எடை சுமார் 46 கிலோ என்றும் வனத்துறை அதிகாரிகள் தெரிவித்துள்ளனர். “பெரும்பாலான தந்தங்கள் தனக்குக் கிடைத்த பரிசுகளாகவும், மற்றும் சில பரம்பரையாக வந்தவை” என்று மோகன்லால் தரப்பில் விளக்கம் அளிக்கப்பட்டுள்ளது.
இந்த அறிவிப்பைத் தொடர்ந்து, அந்த தந்தங்கள் உண்மையான யானைகளுடையதா அல்லது போலியானதா என்பதைச் சரிபார்க்க, ‘டி.என்.ஏ’ (DNA) பரிசோதனை நடத்தப்பட உள்ளதாக வனத்துறை வட்டாரங்கள் தெரிவிக்கின்றன. இதற்கிடையில், சட்டவிரோதமாக வனவிலங்கு பொருட்களை வைத்திருந்ததாக அவர் மீதான சட்டப் போராட்டம் தொடர்ந்து நடைபெற்று வருகிறது.
சட்ட விதிகளுக்கு உட்பட்டு, பொருட்களை அறிவிப்பதன் மூலம் சட்ட சிக்கல்களைத் தவிர்க்க மோகன்லால் இந்த முடிவை எடுத்துள்ளதாகக் கூறப்படுகிறது. இருப்பினும், இந்த விவகாரம் கேரள அரசியலிலும், சினிமா வட்டாரங்களிலும் தொடர்ந்து விவாதப் பொருளாகவே உள்ளது. வனத்துறையின் அடுத்தகட்ட நடவடிக்கையைப் பொறுத்தே, இந்த விவகாரத்தில் சட்ட ரீதியான இறுதித் தீர்வு என்ன என்பது தெரியவரும்.
