தமிழ் திரையுலகில் இயக்குநர்களின் திரைப்படங்கள் மற்றும் நடிகர் கூட்டணி குறித்த விவாதங்கள் அவ்வப்போது சமூக வலைதளங்களில் பேசுபொருளாக மாறுவது வழக்கம். அந்த வகையில், நடிகர் சிவகார்த்திகேயனுடன் இணைந்து பணியாற்றவிருந்த திட்டம் தாமதமானது குறித்தும், அது தொடர்பாக எழுந்த சர்ச்சைகள் குறித்தும் பிரபல இயக்குநர் வெங்கட் பிரபு வெளிப்படையாகப் பேசி முற்றுப்புள்ளி வைத்துள்ளார். இது குறித்த அவரது விளக்கம் தற்போது கோலிவுட் வட்டாரத்தில் பெரிதும் கவனிக்கப்பட்டு வருகிறது.
இதுகுறித்து அவர் வெளியிட்டுள்ள விளக்கத்தில், “எஸ்கே (சிவகார்த்திகேயன்) எப்போதும் எனக்கு ஒரு நல்ல நண்பர் மற்றும் சகோதரன் போன்றவர். தற்போது பல வகையான ஊகங்களும் சர்ச்சைகளும் பரவி வருகின்றன. ஒரு தந்தையாக, தன் சொந்த மகனைச் சார்ந்த ஒரு படம் தாமதமாகும் போது ஏற்படுகிற விரக்தி இயல்பானதே. அவருக்கு முழுமையான சூழ்நிலை தெரிந்திருக்க வாய்ப்பில்லை, அதற்காக நான் அவரைக் குறை கூற முடியாது” என்று தெரிவித்துள்ளார். (வெங்கட் பிரபுவின் திரைப்படம் தாமதமாவது குறித்தும், சிவகார்த்திகேயன் மற்றும் வெங்கட் பிரபு இடையிலான சர்ச்சை குறித்தும் கங்கை அமரன் சமீபத்திய பேட்டி ஒன்றில் பேசியிருந்தாலும், அந்த நடிகரின் பெயரை அவர் திட்டவட்டமாகத் தவிர்த்துவிட்டார்.)
மேலும், தன் பணிகளைப் பற்றி யாரிடமும் விரிவாகப் பேசாத அமைதியான குணம் கொண்டவன் தான் என்றும் அவர் குறிப்பிட்டார்.
தொடர்ந்து பேசிய வெங்கட் பிரபு, பல்வேறு காரணங்களால் இந்தத் திட்டம் தற்போதைக்குத் தொடங்கப்படவில்லை என்றும், இதில் எந்தவிதமான மனக்கசப்பும் இல்லை என்றும் தெளிவுபடுத்தினார். எதிர்காலத்தில் சரியான நேரமும் நல்ல கதையும் அமையும் பட்சத்தில் சிவகார்த்திகேயனுடன் மீண்டும் இணைந்து பணியாற்ற விரும்புவதாகவும் அவர் கூறினார். மேலும், வதந்திகளுக்கு முற்றுப்புள்ளி வைக்குமாறு கேட்டுக்கொண்டுள்ள அவர், தனது அடுத்தடுத்த பணிகளில் பிஸியாக இருப்பதாகவும், தனது தம்பியின் ‘சேயோன்’ படத்திற்கு வாழ்த்துகளையும் தெரிவித்துள்ளார்.
