மலையாள திரையுலகின் முன்னணி இயக்குநரான மிதுன் மானுவேல் தாமஸ் இயக்கத்தில், முற்றிலும் மாறுபட்ட க்ரைம்-த்ரில்லர் ஜானரில் உருவாகியுள்ள புதிய வெப் தொடர் ‘அனலி’ (Anali). முன்னணி ஓடிடி தளமான ஜியோ ஹாட்ஸ்டாரில் (JioHotstar) விரைவில் வெளியாகவுள்ள இந்தத் தொடர், கேரளாவை உலுக்கிய நிஜ வாழ்க்கை தொடர் கொலை சம்பவங்களை அடிப்படையாகக் கொண்டு தயாரிக்கப்பட்டுள்ளது. ஆசியாவிட்டி ஸ்டுடியோஸ் (Asiaville Studios) தயாரிப்பில் உருவாகியுள்ள இந்தத் தொடர் மீதான எதிர்பார்ப்பு சினிமா வட்டாரத்தில் எழுந்துள்ளது.
இந்தத் தொடரில் நடிகைகள் நிகிலா விமல் மற்றும் லியோனா லிஷோய் ஆகியோர் முதன்மை கதாபாத்திரங்களில் நடித்து அசத்தியுள்ளனர். கடுமையான ஒழுக்கக் கட்டுப்பாடுகளுக்கு இடையில் வளர்க்கப்படும் ஒரு பெண், தன் வாழ்வின் ரகசியமான மற்றும் தீவிரமான கட்டங்களை எட்டும்போது எத்தகைய விபரீத முடிவுகளை எடுக்கிறாள் என்பதே இப்படத்தின் மையக்கதை. குற்றப் பின்னணியும், உளவியல் சார்ந்த திருப்பங்களும் நிறைந்த திரைக்கதையை இயக்குநர் மிதுன் மானுவேல் தாமஸும், ஜான் மந்த்ரிகலும் இணைந்து எழுதியுள்ளனர்.
வழக்கமான திரில்லர் கதைகளில் இருந்து விலகி, மிகத்துல்லியமான தடயவியல் சோதனைகள் மற்றும் காவல்துறை விசாரணைகளை இந்தத் தொடர் கொண்டுள்ளது. லியோனா லிஷோய் மற்றும் நிகிலா விமலின் நடிப்பு தொடரின் பலமாக அமைந்திருப்பதாக படக்குழு தரப்பில் தெரிவிக்கப்பட்டுள்ளது. விசாரணைப் படங்களின் வரிசையில் இது ரசிகர்களை வெகுவாக ஈர்க்கும் வகையில் வடிவமைக்கப்பட்டுள்ளது.
மலையாளம் உள்ளிட்ட பல்வேறு முக்கிய மொழிகளில் பான்-இந்தியா அளவில் ஜியோ ஹாட்ஸ்டார் தளத்தில் இந்தத் தொடர் வெளியாகவுள்ளது. படப்பிடிப்பு மற்றும் போஸ்ட் புரொடக்ஷன் பணிகள் அனைத்தும் நிறைவடைந்துள்ள நிலையில், விரைவில் அதிகாரப்பூர்வ ரிலீஸ் தேதி குறித்த அறிவிப்பு வெளியாகும் என எதிர்பார்க்கப்படுகிறது.
