தமிழ் திரையுலகில் நடிகர் மற்றும் தயாரிப்பாளரான விஷ்ணு விஷால் (Vishnnu Vishal), இயக்குநர் அருண்ராஜா காமராஜ் (Arunraja Kamaraj) இயக்கத்தில் தான் நடிக்கவிருந்த புதிய படம் குறித்து நிலவி வந்த ஊகங்களுக்கு முற்றுப்புள்ளி வைக்கும் வகையில் அதிகாரப்பூர்வ அறிக்கையொன்றை வெளியிட்டுள்ளார். கடந்த சில நாட்களாக இவர்களின் கூட்டணி குறித்த வதந்திகள் பரவி வந்த நிலையில், நிலைமை என்ன என்பதை ரசிகர்களுக்குத் தெளிவுபடுத்துவது தனது கடமை என அவர் குறிப்பிட்டுள்ளார்.
கடந்த ஒரு வருடமாக தான் மிகவும் எதிர்நோக்கிக் காத்திருந்த இந்தப் ப்ராஜெக்ட்டிற்காக கடந்த பத்து மாதங்களாக தீவிரமாகத் தயாரிப்புப் பணிகளில் ஈடுபட்டு வந்ததாக விஷ்ணு விஷால் தெரிவித்துள்ளார். ‘கட்டா குஸ்தி 2’ படத்திற்குப் பிறகு தொடங்கும் எனத் திட்டமிடப்பட்டிருந்த இப்படத்தை உயிர்ப்பிக்க தான் மிகவும் உற்சாகமாக இருந்ததாகவும் அவர் கூறியுள்ளார்.
ஆனால், சமீப காலமாக இயக்குநருடன் ஏற்பட்ட கிரியேட்டிவ் வேறுபாடுகள் (Creative Differences) மற்றும் பட்ஜெட் சிக்கல்கள் காரணமாக இப்படத்தைத் தொடர வேண்டாம் என முடிவெடுத்துள்ளதாக அவர் கூறியுள்ளார். தற்போதைய திரைத்துறையில் பட்ஜெட் என்பது மிகப்பெரிய சவாலாக உருவெடுத்துள்ளதையும் அவர் சுட்டிக்காட்டியுள்ளார். எவ்வளவோ முயன்றும் காரியங்கள் கைக்கூடாததால், இரு தரப்புக்கும் இது கடினமான முடிவு என்றாலும் இந்தப் ப்ராஜெக்ட்டில் இருந்து விலகுவதைத் தவிர வேறு வழியில்லை என்று அவர் குறிப்பிட்டுள்ளார். மேலும், இது தொடர்பான சட்டப்படியான நடைமுறைகள் முறைப்படுத்தப்படும் என்றும், அருண்ராஜா காமராஜின் எதிர்கால முயற்சிகளுக்குத் தன் வாழ்த்துகளையும் அவர் தெரிவித்துள்ளார்.
தற்போது தனது கவனம் முழுவதும் ‘இரண்டு வானம்’ (Irandu Vaanam) படத்தின் வெளியீடு மற்றும் தனது தம்பி நடிக்கும் ‘ எல்லோ எல்லோ டர்ட்டி பெல்லோ’ (Yellow Yellow Dirty Fellow) படத்தின் மீதும் இருப்பதாக அவர் கூறியுள்ளார். மேலும், மிக விரைவில் ஒரு புதிய மற்றும் தனித்துவமான அறிவிப்பை வெளியிட உள்ளதாகவும் விஷ்ணு விஷால் தனது அறிக்கையில் தெரிவித்துள்ளார்.
