சூப்பர் ஸ்டார் ரஜினிகாந்த் மற்றும் உலகநாயகன் கமல்ஹாசன் சுமார் 46 ஆண்டுகளுக்குப் பிறகு ஒரு திரைப்படத்திற்காக மீண்டும் இணைந்துள்ளனர். கமல்ஹாசனின் ராஜ்கமல் ஃபிலிம்ஸ் இன்டர்நேஷனல் தயாரிப்பில் ரஜினிகாந்த் நடிக்கும் இந்தப் படத்திற்கு தற்காலிகமாக ‘தலைவர் 173’ என்று பெயரிடப்பட்டுள்ளது. ‘டான்’ பட புகழ் இயக்குனர் சிபி சக்கரவர்த்தி இயக்கும் இந்தப் படத்தின் முதற்கட்ட பணிகள் தற்போது சென்னையில் விறுவிறுப்பாக நடைபெற்று வருகின்றன. இந்நிலையில், இந்தப் படத்தில் ரஜினிகாந்தின் தோற்றம் குறித்து ஒரு ஆச்சரியமான தகவல் வெளியாகியுள்ளது.
இந்தப் படத்தில் ரஜினிகாந்த் ஒரு நவீன தையல்காரர் (Tailor) கதாபாத்திரத்தில் நடிக்க உள்ளதாகக் கூறப்படுகிறது. ஹாலிவுட்டில் வெளியாகி மிகப்பெரிய வரவேற்பைப் பெற்ற ‘தி அவுட்பிட்’ (The Outfit) திரைப்படத்தின் தழுவலாக இந்தப் படம் உருவாக இருப்பதாகத் தெரிகிறது. ஒரு தையல்காரர் தனது கடைக்குள் வரும் கேங்ஸ்டர்களை தனது புத்திசாலித்தனத்தால் எப்படி எதிர்கொள்கிறார் என்பதே படத்தின் கருவாக இருக்கும் என எதிர்பார்க்கப்படுகிறது. இதற்காக ரஜினிகாந்தின் தோற்றத்தை மிகவும் நேர்த்தியாகவும் வித்தியாசமாகவும் காட்ட இயக்குனர் சிபி சக்கரவர்த்தி திட்டமிட்டுள்ளார்.
இதனை முன்னிட்டு முன்னணி ஆடை வடிவமைப்பாளர்கள் மற்றும் சிகையலங்கார நிபுணர்களுடன் இணைந்து ரஜினிகாந்திற்காக சுமார் 83 விதமான தோற்றங்களை (Looks) இயக்குனர் வடிவமைத்துள்ளார். ரஜினிகாந்தின் முந்தைய படங்களான ஜெயிலர் அல்லது வேட்டையன் போன்ற படங்களின் சாயல் ஏதும் இல்லாத வகையில், முற்றிலும் புதிய பரிமாணத்தில் அவரைத் திரையில் காட்ட வேண்டும் என்பதே சிபியின் நோக்கம். இந்த 83 தோற்றங்களில் இருந்து மிகவும் தனித்துவமான மற்றும் மாஸான 3 சிறப்பு கெட்டப்புகள் தற்போது இறுதிப் பட்டியலுக்குத் தேர்வு செய்யப்பட்டுள்ளன.
இந்த மூன்று தோற்றங்களையும் ரஜினிகாந்த் விரைவில் நேரில் பார்வையிட்டு, அவற்றில் தனக்கு மிகவும் பொருத்தமான ஒரு தோற்றத்தை அவரே இறுதி செய்யவுள்ளார். ரஜினிகாந்தின் ஒப்புதல் கிடைத்தவுடன், அந்தத் தோற்றத்தை மையப்படுத்தி படத்தின் அதிகாரப்பூர்வ ஃபர்ஸ்ட் லுக் போஸ்டர் வெளியிடப்படும் என்று எதிர்பார்க்கப்படுகிறது. சமீபத்தில் வெளியான இப்படத்தின் அறிவிப்பு போஸ்டரில் கத்தரிக்கோல், ஊசி மற்றும் துப்பாக்கி ஆகியவை இடம் பெற்றிருந்தது, படத்தின் தலைப்பு மற்றும் ரஜினியின் கதாபாத்திரம் குறித்த ஆர்வத்தை ரசிகர்கள் மத்தியில் தூண்டியுள்ளது.
தலைவர் 173 திரைப்படத்தின் படப்பிடிப்பு வரும் ஏப்ரல் 20, 2026 அன்று முறைப்படி தொடங்க உள்ளது. அனிருத் ரவிச்சந்தர் இசையமைக்கும் இந்தப் படத்தில் மலையாள நடிகர் பேசில் ஜோசப், ஷோபனா மற்றும் பிரியங்கா மோகன் ஆகியோர் முக்கிய கதாபாத்திரங்களில் நடிக்க ஒப்பந்தமாகியுள்ளனர். கிட்டத்தட்ட 35 ஆண்டுகளுக்குப் பிறகு நடிகை ஷோபனா மீண்டும் ரஜினிகாந்துடன் இணைந்து நடிப்பது குறிப்பிடத்தக்கது. சட்டமன்றத் தேர்தல் முடிவுகளுக்குப் பிறகு படத்தின் முக்கிய ஆக்க்ஷன் காட்சிகள் படமாக்கப்பட உள்ளன.
இயக்குனர் சிபி சக்கரவர்த்தி ரஜினிகாந்தின் தீவிர ரசிகர் என்பதால், தனது முதல் படமான டான் படத்தில் காட்டிய அதே எனர்ஜியை இந்தப் படத்திலும் பிரதிபலிக்கச் செய்வார் என்று எதிர்பார்க்கப்படுகிறது. ரஜினிகாந்தின் 75-வது வயதில் வெளியாகும் படங்களில் ஒன்றாக இது அமைவதால், அவரது வயதிற்கு ஏற்றவாறு அதே சமயம் ஸ்டைலான தோற்றத்தை உறுதி செய்ய படக்குழுவினர் கடுமையாக உழைத்து வருகின்றனர். பொங்கல் 2027 பண்டிகையை முன்னிட்டு திரையரங்குகளில் இந்தப் படத்தை வெளியிடத் தயாரிப்பு நிறுவனம் திட்டமிட்டுள்ளது.
கமல்ஹாசனின் தயாரிப்பில் ரஜினிகாந்த் நடிப்பது இதுவே முதல் முறை என்பதால், படத்தின் தரத்தில் எந்தவித சமரசமும் செய்யாமல் மிக பிரம்மாண்டமாக உருவாக்கி வருகின்றனர். தற்போது இறுதி செய்யப்பட்டுள்ள 3 கெட்டப்புகளில் ரஜினி எதைத் தேர்வு செய்வார் என்பதே கோலிவுட்டின் இப்போதைய ஹாட் டாபிக். விரைவில் இது குறித்த அதிகாரப்பூர்வமான அறிவிப்புகள் மற்றும் புகைப்படங்கள் வெளியாகி ரசிகர்களை உற்சாகப்படுத்தும் என்று எதிர்பார்க்கப்படுகிறது.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
