தமிழ் திரையுலகமே ஆவலுடன் எதிர்பார்த்து காத்திருக்கும் சூப்பர் ஸ்டார் ரஜினிகாந்தின் ‘ஜெயிலர் 2’ (Jailer 2) படப்பிடிப்பு தளத்தில் பெரும் சோகம் நிகழ்ந்துள்ளது. இயக்குநர் நெல்சன் திலீப்குமார் இயக்கத்தில், சன் பிக்சர்ஸ் தயாரிப்பில் உருவாகி வரும் இப்படத்தின் இறுதிக்கட்டப் பணிகள் சென்னையில் விறுவிறுப்பாக நடைபெற்று வந்த நிலையில், மின்சாரம் தாக்கி ஊழியர் ஒருவர் உயிரிழந்துள்ளார்.
சென்னையை அடுத்த பனையூர் பகுதியில் உள்ள தனியார் ஸ்டுடியோவில் நேற்று (வியாழக்கிழமை) இந்த விபத்து நிகழ்ந்தது. கலைத்துறையில் பணியாற்றி வந்த 28 வயதான கார்த்திகேயன் என்பவர், படப்பிடிப்பு தளத்தில் வீடு போன்ற செட் அமைக்கும் பணியில் ஈடுபட்டிருந்தார். அப்போது எதிர்பாராத விதமாக மின் கசிவு ஏற்பட்டு, அவர் மீது மின்சாரம் பாய்ந்தது. இதில் படுகாயமடைந்த அவர் சம்பவ இடத்திலேயே உயிரிழந்தார். இந்தச் சம்பவம் படக்குழுவினர் மத்தியில் பெரும் அதிர்ச்சியை ஏற்படுத்தியுள்ளது.
கானாத்தூர் காவல் துறையினர் இந்த விபத்து குறித்து வழக்குப் பதிவு செய்து தீவிர விசாரணை நடத்தி வருகின்றனர். படப்பிடிப்பு தளத்தில் பாதுகாப்பு ஏற்பாடுகள் முறையாகச் செய்யப்பட்டிருந்ததா? அல்லது மின் கசிவுக்குக் காரணம் என்ன? என்பது குறித்து விசாரணை நடைபெற்று வருகிறது. முன்னதாக ஏப்ரல் 21-ம் தேதியே படப்பிடிப்பு முடிந்துவிட்டதாகத் தகவல்கள் வெளியான நிலையில், தற்போது இறுதிக்கட்ட பணிகளின் போது இந்த விபத்து நேர்ந்துள்ளது குறிப்பிடத்தக்கது. தயாரிப்பு நிறுவனமான சன் பிக்சர்ஸ் தரப்பிலிருந்து இது குறித்து அதிகாரப்பூர்வ அறிக்கை இன்னும் வெளியாகவில்லை.
இந்த விபத்தால் ‘ஜெயிலர் 2’ படத்தின் வெளியீட்டுத் தேதியில் மாற்றம் ஏற்படலாம் என எதிர்பார்க்கப்படுகிறது. ரஜினிகாந்த் முன்னதாக ஜூன் 12, 2026 அன்று படம் வெளியாகும் எனக் குறிப்பிட்டிருந்தார். ஆனால், தற்போது பணிகள் இன்னும் முழுமையடையாத நிலையில், ரிலீஸ் தேதி தள்ளிப்போக வாய்ப்புள்ளது. 2023-ல் வெளியாகி சுமார் 600 கோடிக்கும் மேல் வசூல் செய்த ‘ஜெயிலர்’ படத்தின் இரண்டாம் பாகம் என்பதால், இப்படத்தின் மீதான எதிர்பார்ப்பு மிக அதிகமாக உள்ளது. ரம்யா கிருஷ்ணன், யோகி பாபு உள்ளிட்டோர் நடிக்கும் இப்படத்தின் பணிகளில் நிகழ்ந்துள்ள இந்த உயிரிழப்பு திரையுலகினர் இடையே சோகத்தை ஏற்படுத்தியுள்ளது.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
