கோலிவுட்டின் மெகா தயாரிப்பு நிறுவனமான சன் பிக்சர்ஸ், தற்போது சூப்பர் ஸ்டார் ரஜினிகாந்தின் ‘ஜெயிலர் 2’ மற்றும் லோகேஷ் கனகராஜ் முதன்முறையாக ஹீரோவாக நடிக்கும் ‘டிசி’ (DC) ஆகிய இரண்டு மெகா பட்ஜெட் படங்களைத் தயாரித்து வருகிறது. இந்தப் படங்களின் மீதான எதிர்பார்ப்பு இப்போதே விண்ணைத் தொட்டுள்ள நிலையில், தற்போது இதன் டிஜிட்டல் உரிமை குறித்த ஒரு அதிரடி தகவல் சினிமா வியாபார வட்டாரத்தில் தீயாய் பரவி வருகிறது.
இந்த இரண்டு படங்களையும் சேர்த்து ஒரே பேக்கேஜாக சுமார் 200 கோடி ரூபாய்க்கு அவுட்ரைட் (Outright) முறையில் விற்பனை செய்ய சன் பிக்சர்ஸ் முடிவு செய்துள்ளதாம். இதில் ரஜினியின் ‘ஜெயிலர் 2’ படத்திற்கு மட்டும் 165 கோடி ரூபாயும், லோகேஷ் கனகராஜின் ‘டிசி’ படத்திற்கு 35 கோடி ரூபாயும் என மதிப்பிடப்பட்டுள்ளது. ஒரு தயாரிப்பு நிறுவனமாக சன் பிக்சர்ஸ் தனது பிசினஸில் எப்போதுமே கில்லியாக இருக்கும் என்பதற்கு இதுவே ஒரு சாட்சி.
டிஜிட்டல் மார்க்கெட்டில் நிலவும் மந்தநிலை காரணமாக ஓடிடி நிறுவனங்கள் இந்த டீலில் கொஞ்சம் தயக்கம் காட்டி வருவதாகச் சொல்லப்படுகிறது.
தற்போதுள்ள சூழலில் பெரும்பாலான ஓடிடி நிறுவனங்கள் ஒரு படத்தை மொத்தமாக விலைக்கு வாங்குவதை விட, அந்தப் படம் திரையரங்குகளில் வசூலிக்கும் லாபத்தைப் பொறுத்து தொகை வழங்கும் ‘பெர்ஃபார்மன்ஸ் பேஸ்டு’ (Performance-based) மாடலைத் தான் விரும்புகின்றன. ஆனால், சன் பிக்சர்ஸ் நிறுவனம் இந்த விஷயத்தில் மிகவும் ஸ்ட்ரிக்ட்டாக இருப்பதாகத் தெரிகிறது. தங்களுக்கு வேண்டிய 200 கோடி ரூபாயை அவுட்ரைட் டீலாக முடிப்பதில் அவர்கள் உறுதியாக உள்ளனர்.
நெல்சன் மற்றும் ரஜினி கூட்டணி மீண்டும் இணைவதால் ஜெயிலர் 2 படத்தின் மீது மிகப்பெரிய வர்த்தக ரீதியான நம்பிக்கை உள்ளது. அதேபோல், இயக்குநராக முத்திரை பதித்த லோகேஷ் கனகராஜ் ஹீரோவாக அவதாரம் எடுக்கும் டிசி படத்தின் மீதும் ரசிகர்களுக்குத் தனி ஆர்வம் உண்டு. இந்த இரண்டு படங்களின் வெற்றியும் ஏற்கனவே உறுதி செய்யப்பட்ட ஒன்றாகப் பார்க்கப்படுவதால், எப்படியும் இந்த டீல் சன் பிக்சர்ஸ் எதிர்பார்க்கும் விலையிலேயே முடியும் என எதிர்பார்க்கப்படுகிறது.
மார்க்கெட் நிலவரம் எப்படி இருந்தாலும், சன் பிக்சர்ஸ் தனது டிஜிட்டல் உரிமையை விரைவில் ஒரு முன்னணி ஓடிடி தளத்திற்கு உறுதி செய்துவிடும் எனத் தெரிகிறது.
இந்த மெகா டீல் குறித்த அதிகாரப்பூர்வ அறிவிப்பு இன்னும் சில வாரங்களில் வெளியாகலாம் என எதிர்பார்க்கப்படுகிறது. ரஜினியின் மாஸும் லோகேஷின் பிராண்டும் இணையும் இந்த வியாபாரம், தமிழ் சினிமாவின் டிஜிட்டல் வர்த்தகத்தில் ஒரு புதிய மைல்கல்லாக அமையும் என்பதில் சந்தேகமில்லை.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
