திருப்பதி கோயிலுக்கு நாங்கள் ஒருபோதும் நெய் சப்ளை செய்யவில்லை என்று அமுல் நிறுவனம் விளக்கம் கொடுத்துள்ளது.
திருப்பதி ஏழுமலையான் கோவிலில் பிரசாதமாக வழங்கப்பட்டு வரும் லட்டு குறித்து மிகப்பெரிய சர்ச்சை எழுந்துள்ளது. இது தொடர்பாக ஆந்திரா அரசிடம் மத்திய அரசு விளக்கம் கேட்டுள்ளது. இதனிடையே நெய்யில் மாட்டுக் கொழுப்பு இருந்தது உண்மைதான் என்று தேவஸ்தானம் ஒப்புதல் அளித்துள்ளதால் இந்த விவகாரம் மேலும் விஸ்வரூபம் எடுத்துள்ளது.
இந்நிலையில் ஆந்திர மாநிலம் திருப்பதியில் உள்ள ஏழுமலையான் கோவிலில் வழங்கப்படும் பிரசாதத்தில் விலங்குகளின் கொழுப்பு பயன்படுத்துவது குறித்த சர்ச்சைக்கு மத்தியில் திருமலை திருப்பதி கோவிலுக்கு நாங்கள் நெய் சப்ளை செய்யவில்லை என அமுல் நிறுவனம் விளக்கம் கொடுத்துள்ளது.
திருப்பதி தேவஸ்தானத்திற்கு அமுல் நெய் சப்ளை செய்ததாக சில தகவல்கள் ஊடகங்களில் பரவி வரும் நிலையில் தொடர்ந்து அமல் நிறுவனம் விளக்கம் கொடுத்துள்ளது. இது தொடர்பாக அமுல் நிறுவனம் கொடுத்த அறிக்கையில் ‘ஐஏஎஸ்ஓ தர சான்றிதழ் பெற்ற எங்களின் அதிநவீன உற்பத்தி நிலையங்களில் அமுல் நெய் பாலில் இருந்து தான் தயாரிக்கப்படுகிறது என்பதை தெளிவுபடுத்த விரும்புகிறோம்.
அமுல் நெய் உயர்தர தூய பால் கொழுப்பிலிருந்து தயாரிக்கப்படுகின்றது. எங்கள் பால் பண்ணைகளில் பெறப்படும் பால் மிகச்சிறந்த முறையில் தயாரிக்கப்படுகின்றது. FSSAI ஆல் கலப்படம் கண்டறிதல் உட்பட கடுமையான தரச் சோதனைகள் மூலம் அனுப்பப்படுகிறது. அது மட்டும் இல்லாமல் திருப்பதி தேவஸ்தானத்திற்கு நாங்கள் நெய் சப்ளை செய்ததாக கூறப்பட்டு வரும் தகவல் பொய்யானது’ எனவும் அமுல் நிறுவனம் தெரிவித்திருக்கின்றது.
