சமூக வலைதளங்களில் பிரபலங்களை குறிவைத்து நடத்தப்படும் மார்பிங் கொடுமைகள் நாளுக்கு நாள் அதிகரித்து வருகின்றன. சமீபகாலமாகப் பல முன்னணி நடிகைகள் இந்த விவகாரத்தால் மன உளைச்சலுக்கு ஆளாகி வரும் நிலையில், தற்போது நடிகை ஐஸ்வர்யா லட்சுமி இது குறித்துக் கடுமையான முடிவை எடுத்துள்ளார்.
தனது புகைப்படங்களைச் சிலர் மார்பிங் செய்து ஆபாசமாகவும், தரக்குறைவாகவும் சமூக வலைதளங்களில் பரப்பியது தன்னை மிகவும் பாதித்ததாக அவர் கூறியுள்ளார். இது குறித்து அவர் அளித்த பேட்டியில், “எனது புகைப்படங்களை மார்பிங் செய்து ஆபாசமாகச் சமூக வலைதளங்களில் பரப்பினர். அந்தச் சம்பவங்கள் என்னை மனரீதியாக மிகவும் காயப்படுத்தின. எனக்கு 100 கோடி ரூபாய் கொடுத்தால் கூட, நான் மீண்டும் சமூக வலைதளப் பக்கங்களுக்கு வரமாட்டேன்,” என்று அதிரடியாகத் தெரிவித்துள்ளார்.
சமூக வலைதளங்களில் இருந்து விலகிய பிறகுதான் தமக்கு உண்மையான மன அமைதி கிடைத்திருப்பதாகவும், தனிப்பட்ட வாழ்க்கையை நிம்மதியாக அனுபவிப்பதாகவும் அவர் குறிப்பிட்டுள்ளார். சினிமாத் துறையில் இருப்பவர்களுக்குச் சமூக வலைதளங்கள் ஒரு பக்கம் அங்கீகாரத்தைத் தந்தாலும், மறுபக்கம் இதுபோன்ற விஷமத்தனமான செயல்களால் கலைஞர்களின் மனநிலை பெரிதும் பாதிக்கப்படுவதை ஐஸ்வர்யா லட்சுமியின் இந்த முடிவு மீண்டும் வெளிச்சத்திற்குக் கொண்டு வந்துள்ளது.
