தமிழ் சினிமாவில் ‘பாய்ஸ்’ படத்தின் மூலம் அறிமுகமாகி, ‘காதல்’, ‘வெயில்’, ‘எம் மகன்’ என அடுத்தடுத்து சூப்பர் ஹிட் படங்களைக் கொடுத்தவர் நடிகர் பரத். ஒரு காலத்தில் கோலிவுட்டின் சாக்லேட் பாயாக வலம் வந்த இவருக்கு, கடந்த சில ஆண்டுகளாகச் சரியான வெற்றிகள் அமையவில்லை. இந்நிலையில், தனது வரவிருக்கும் படமான ‘காளிதாஸ் 2’ படத்தின் ப்ரோமோஷன் நிகழ்ச்சிகளில் கலந்து கொண்ட பரத், தனது சினிமா கரியர் குறித்து மிகவும் உருக்கமாகப் பேசியுள்ளார்.
அவர் பேசுகையில், “பல நேரங்களில் மக்கள் என்னிடம் வந்து, ‘எதுவுமே பண்ணாதவங்க கூட இப்போ எங்கயோ போயிட்டாங்க, ஆனா நீங்க இன்னும் அங்கேயே இருக்கீங்களே’ என்று சொல்வார்கள். அதைக் கேட்கும்போது எனக்கு மிகவும் கஷ்டமாக இருக்கும். ஆனால் அது அவர்களது தலைவிதி மற்றும் அதிர்ஷ்டம் என்றுதான் நான் கருதுகிறேன். நான் சில தவறான படங்களைத் தேர்ந்தெடுத்ததால், மக்கள் என் படங்களைப் பார்க்க வரவில்லை. அது எனது தவறுதான்” என்று வெளிப்படையாகத் தனது தோல்விகளை ஒப்புக்கொண்டார்.
மேலும் கிரிக்கெட் வீரர் சஞ்சு சாம்சனை உதாரணமாகக் காட்டிப் பேசிய பரத், “நான் இன்னும் இந்த ரேஸில் தான் இருக்கிறேன். சஞ்சு சாம்சன் எப்படிப் பல போராட்டங்களுக்குப் பிறகு ஒரு பெரிய இன்னிங்ஸ் ஆடித் தனது திறமையை நிரூபித்தாரோ, அதேபோல் ஒரு நாள் நானும் ஒரு பெரிய ஹிட் கொடுத்து மீண்டும் முன்னணி இடத்திற்கு வருவேன். ரசிகர்கள் இப்போதும் எனது கம்பேக்கிற்காகக் காத்துக் கொண்டிருக்கிறார்கள். அது நிச்சயம் நடக்கும்” என்று நம்பிக்கையுடன் தெரிவித்துள்ளார்.
பரத்தின் இந்தப் பேட்டி இப்போது சமூக வலைதளங்களில் வைரலாகி வருகிறது. எதார்த்தமான உண்மைகளை மறைக்காமல் பேசிய பரத்திற்கு ரசிகர்கள் பலரும் தங்களது ஆதரவைத் தெரிவித்து வருகின்றனர். ‘காளிதாஸ் 2’ படம் அவருக்கு ஒரு மிகப்பெரிய திருப்புமுனையாக அமையும் என்று எதிர்பார்க்கப்படுகிறது. திறமை இருந்தும் சரியான வாய்ப்புக்காகக் காத்திருக்கும் பரத்தின் இந்த விடாமுயற்சி நிச்சயம் அவருக்குப் பலன் தரும் என்று திரைத்துறை வட்டாரங்கள் தெரிவிக்கின்றன.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
