இந்தியத் திரையுலகின் இரு துருவங்களான சூப்பர் ஸ்டார் ரஜினிகாந்த் மற்றும் பாலிவுட் பாட்ஷா ஷாருக்கான் நீண்ட இடைவெளிக்குப் பிறகு ஒரே திரையில் இணையவுள்ள செய்தி தற்போது உறுதி செய்யப்பட்டுள்ளது. இயக்குநர் நெல்சன் திலீப்குமார் இயக்கத்தில் உருவாகி வரும் ‘ஜெயிலர் 2’ (Jailer 2) திரைப்படத்தில் ஷாருக்கான் ஒரு மிக முக்கியமான கௌரவத் தோற்றத்தில் நடிக்க ஒப்பந்தமாகியுள்ளார். குறிப்பாக, இந்தப் படத்தில் அவர் ஒரு அதிரடி போலீஸ் அதிகாரியாக (Cop) தோன்றுவார் என்ற தகவல் தற்போது கசிந்துள்ளது.
‘ஜெயிலர்’ முதல் பாகத்தில் ரஜினிகாந்த் ஓய்வு பெற்ற ஜெயிலரான ‘டைகர்’ முத்துவேல் பாண்டியனாகத் தோன்றி வசூல் சாதனை படைத்தார். அதன் தொடர்ச்சியாக உருவாகும் இரண்டாம் பாகத்தில், கதையின் தீவிரத்தை அதிகரிக்க ஷாருக்கானின் கதாபாத்திரம் வடிவமைக்கப்பட்டுள்ளது. அவர் ரஜினியின் கதாபாத்திரத்திற்கு மிகவும் நெருக்கமான ஒரு உயர் போலீஸ் அதிகாரியாக வருவார் என எதிர்பார்க்கப்படுகிறது. இதற்கான படப்பிடிப்பு இந்த மார்ச் மாதத்திலேயே திட்டமிடப்பட்டுள்ளது.
சுமார் 7 முதல் 8 நாட்கள் வரை நடைபெறவுள்ள இந்த இறுதிக்கட்டப் படப்பிடிப்பில், ரஜினிகாந்த் மற்றும் ஷாருக்கான் ஆகியோருடன் நடிகர் எஸ்.ஜே.சூர்யாவும் இணையவுள்ளார். இவர்கள் மூவரும் இணையும் ‘காம்பினேஷன்’ காட்சிகள் படத்தின் ஹைலைட்டாக அமையும் எனத் திரைத்துறை வட்டாரங்கள் தெரிவிக்கின்றன. ஏற்கனவே முதல் பாகத்தில் மோகன்லால் மற்றும் சிவராஜ்குமார் ஆகியோரின் வருகை ரசிகர்களை உற்சாகப்படுத்திய நிலையில், இரண்டாம் பாகத்தில் ஷாருக்கானின் ‘Extended Cameo’ இன்னும் பெரிய தாக்கத்தை ஏற்படுத்தும்.
சன் பிக்சர்ஸ் நிறுவனம் தயாரிக்கும் இந்தப் படத்தில் மிதுன் சக்ரவர்த்தி, வித்யா பாலன், ரம்யா கிருஷ்ணன், வினாயகன் உள்ளிட்ட மிகப்பெரிய நட்சத்திரப் பட்டாளமே இணைந்துள்ளது. 2026-ம் ஆண்டு ஜூன் மாதம் 12-ம் தேதி இந்தப் படம் திரைக்கு வர வாய்ப்புள்ளதாகக் கூறப்படும் நிலையில், ஷாருக்கானின் பகுதிகள் படமாக்கப்பட்டவுடன் ஒட்டுமொத்தப் படப்பிடிப்பும் நிறைவடையும். நெல்சனின் இயக்கத்தில் அனிருத் இசையமைக்கும் இந்தப் படம், இந்திய சினிமாவின் மிகப்பெரிய ‘மல்டி-ஸ்டாரர்’ திரைப்படமாக உருவெடுத்துள்ளது.
ஷாருக்கான் மற்றும் ரஜினிகாந்த் இதற்கு முன்னதாக 2011-ல் ‘ரா-ஒன்’ படத்தில் இணைந்து பணியாற்றியிருந்தனர். தற்போது 15 ஆண்டுகளுக்குப் பிறகு இவர்கள் இருவரும் திரையில் தோன்றுவது ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. குறிப்பாக ஷாருக்கான் போலீஸ் சீருடையில் ரஜினியுடன் இணைந்து செய்யும் அதிரடி காட்சிகள் தியேட்டர்களில் திருவிழா கோலத்தை உருவாக்கும் என்பதில் சந்தேகமில்லை.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
