தமிழ் சினிமாவின் மூத்த மற்றும் பன்முகத் திறமை கொண்ட நடிகை ராதிகா சரத்குமார் முதன்மை கதாபாத்திரத்தில் நடித்துள்ள ‘தாய் கிழவி’ திரைப்படம் சர்வதேச அரங்கில் மாபெரும் கௌரவத்தைப் பெற்றுள்ளது. கோவாவில் நடைபெறும் 57-வது இந்திய சர்வதேச திரைப்பட விழாவின் (IFFI) மிகவும் மதிப்புமிக்க ‘இந்தியன் பனோரமா’ (Indian Panorama) பிரிவுக்கு இத்திரைப்படம் அதிகாரப்பூர்வமாகத் தேர்ந்தெடுக்கப்பட்டுள்ளதாகப் படக்குழுவினர் மகிழ்ச்சியுடன் அறிவித்துள்ளனர்.
கலைநயமும், மண் மணம் மாறாத வாழ்வியல் உணர்வுகளும் கொண்ட சிறந்த இந்தியத் திரைப்படங்களை உலக அளவில் காட்சிப்படுத்தும் தளமாக ‘இந்தியன் பனோரமா’ பிரிவு கருதப்படுகிறது. அத்தகைய உயரிய பிரிவில் ‘தாய் கிழவி’ திரைப்படம் தேர்வாகியிருப்பது தமிழ் திரையுலகிற்குக் கிடைத்துள்ள மிகப்பெரிய பெருமையாகப் பார்க்கப்படுகிறது. இப்படத்தில் ராதிகா சரத்குமாரின் எதார்த்தமான மற்றும் அழுத்தமான நடிப்பு விமர்சகர்கள் மத்தியிலும் பார்வையாளர்கள் மத்தியிலும் ஏற்கனவே பெரும் பாராட்டுகளைப் பெற்றிருந்தது குறிப்பிடத்தக்கது.
கோவா சர்வதேச திரைப்பட விழாவில் உலகெங்கிலும் உள்ள திரை ஆளுமைகள் மற்றும் சர்வதேசப் பார்வையாளர்கள் முன்னிலையில் ‘தாய் கிழவி’ திரையிடப்படவுள்ளது. இந்த அறிவிப்பு வெளியானதிலிருந்து நடிகை ராதிகா சரத்குமார் மற்றும் ‘தாய் கிழவி’ படக்குழுவினருக்குத் திரைப் பிரபலங்களும் ரசிகர்களும் சமூக வலைதளங்களில் தங்களது வாழ்த்துகளைக் குவித்து வருகின்றனர்.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
