கேரள மாநிலம் கோழிக்கோட்டில் பேருந்து பயணத்தின் போது தீபக் என்ற இளைஞர் மீது தவறான நடத்தை புகார் அளித்த ஷிம்ஜிதா முஸ்தபா என்பவருக்குக் கோழிக்கோடு நீதிமன்றம் தற்போது ஜாமீன் வழங்கியுள்ளது. ஷிம்ஜிதாவின் புகாரால் மனமுடைந்த தீபக் தற்கொலை செய்து கொண்ட நிலையில், தற்கொலைக்குத் தூண்டியதாகக் கைது செய்யப்பட்ட ஷிம்ஜிதா 21 நாட்கள் சிறைவாசத்திற்குப் பிறகு நிபந்தனை ஜாமீனில் விடுவிக்கப்பட்டுள்ளார்.
இந்தச் சம்பவம் கேரள சமூக வலைதளங்களிலும் ஊடகங்களிலும் பெரும் விவாதத்தை ஏற்படுத்தியிருந்தது. கடந்த சில வாரங்களுக்கு முன்பு, தனியார் பேருந்தில் பயணம் செய்த போது தீபக் தன்னிடம் தவறாக நடந்துகொண்டதாக ஷிம்ஜிதா முஸ்தபா குற்றம்சாட்டினார். இதனைத் தொடர்ந்து காவல்துறை விசாரணை மற்றும் பொதுமக்களின் விமர்சனங்களுக்கு ஆளான தீபக், தான் நிரபராதி என்று கூறி தற்கொலை செய்து கொண்டார். தீபக்கின் மரணத்திற்குப் பிறகு, ஷிம்ஜிதா அளித்த புகாரில் முரண்பாடுகள் இருப்பதாகக் கூறி அவர் மீது தற்கொலைக்குத் தூண்டுதல் உள்ளிட்ட பிரிவுகளின் கீழ் வழக்குப்பதிவு செய்யப்பட்டது.
கோழிக்கோடு நீதிமன்றத்தில் நடைபெற்ற ஜாமீன் விசாரணையின் போது, ஷிம்ஜிதா முஸ்தபா ஏற்கனவே 21 நாட்களாகச் சிறையில் இருப்பதை நீதிமன்றம் கருத்தில் கொண்டது. காவல்துறை விசாரணையின் முக்கியக் கட்டங்கள் முடிவடைந்துள்ளதாலும், இனி அவரைச் சிறையில் வைக்கத் தேவையில்லை என்ற வாதத்தையும் ஏற்று ஜாமீன் வழங்கப்பட்டுள்ளது. இருப்பினும், ஷிம்ஜிதா வழக்கின் விசாரணைக்கு முழுமையாக ஒத்துழைக்க வேண்டும் என்றும், சாட்சிகளைக் கலைக்க முயற்சிக்கக் கூடாது என்றும் நீதிமன்றம் கடுமையான நிபந்தனைகளை விதித்துள்ளது. கேரளாவில் பொய்யான புகார்களால் இளைஞர்கள் பாதிக்கப்படுவதாக எழுந்துள்ள குற்றச்சாட்டுகளுக்கு மத்தியில் இந்த நீதிமன்றத் தீர்ப்பு முக்கியத்துவம் வாய்ந்ததாகப் பார்க்கப்படுகிறது.
