தளபதி விஜய் நடிப்பில் எச். வினோத் இயக்கத்தில் உருவாகியுள்ள ‘ஜனநாயகன்’ திரைப்படம் தமிழ் சினிமாவின் மிகப்பெரிய எதிர்பார்ப்புகளில் ஒன்றாக உள்ளது. விஜய்யின் அரசியல் வருகைக்கு முந்தைய கடைசிப் படம் என்பதால் இதன் மீதான எதிர்பார்ப்பு விண்ணைத் தொட்டுள்ளது. ஆனால், தணிக்கைக் குழுவின் சில நடைமுறைகளால் ரிலீஸ் தள்ளிப்போய்க் கொண்டிருந்த நிலையில், கடந்த ஏப்ரல் 9, 2026 அன்று இப்படம் முழுமையாக இணையத்தில் கசிந்து பெரும் அதிர்ச்சியை ஏற்படுத்தியது.
இந்த விவகாரத்தில் தற்போது அதிரடியான ஒரு திருப்பம் ஏற்பட்டுள்ளது. படத்தின் எடிட்டிங் பணிகளை மேற்கொண்ட எடிட்டர் பிரதீப் ராகவ் (Pradeep Raghav), தென்னிந்தியத் திரைப்பட எடிட்டர் சங்கத்திலிருந்து தற்காலிகமாக இடைநீக்கம் செய்யப்பட்டுள்ளார். படத்தின் பாதுகாப்பில் போதிய அக்கறை காட்டாததும், சங்கத்தில் உறுப்பினராக இல்லாத நபர்களை எடிட்டிங் பணிகளுக்குப் பயன்படுத்தியதும் இந்த நடவடிக்கைக்கு முக்கியக் காரணமாகச் சொல்லப்படுகிறது.
இந்தக் கசிவு விவகாரத்தால் தயாரிப்பு நிறுவனமான கே.வி.என் புரொடக்ஷன்ஸ் மற்றும் படக்குழுவினர் கடும் அப்செட்டில் உள்ளனர். கவனக்குறைவாகச் செயல்பட்டதன் காரணமாகவே படத்தின் ரகசியங்கள் வெளியேறியுள்ளதாக சங்கம் தனது கண்டனத்தைப் பதிவு செய்துள்ளது. இது தொடர்பாக சைபர் கிரைம் போலீஸார் விரிவான விசாரணையைத் தொடங்கியுள்ளனர். எடிட்டிங் ஸ்டுடியோவில் இருந்து காட்சிகள் எப்படி கசிந்தன என்பது குறித்து தீவிரமாக ஆராயப்பட்டு வருகிறது.
சமீபகாலமாக பெரிய பட்ஜெட் படங்கள் இணையத்தில் கசிவது வாடிக்கையாகி வரும் நிலையில், ஒரு முன்னணி எடிட்டர் மீது சங்கம் எடுத்துள்ள இந்த நடவடிக்கை மற்ற தொழில்நுட்பக் கலைஞர்களுக்கும் ஒரு எச்சரிக்கையாகப் பார்க்கப்படுகிறது. விஜய்யின் கடைசிப் படம் என்பதால் ரசிகர்கள் திரையரங்குகளில் கொண்டாடக் காத்திருந்த வேளையில், இந்தச் சம்பவம் ஒட்டுமொத்தக் கோலிவுட் வட்டாரத்தையும் சோகத்தில் ஆழ்த்தியுள்ளது. விரைவில் குற்றவாளிகள் கண்டறியப்பட்டு சட்டப்படி தண்டிக்கப்படுவார்கள் என எதிர்பார்க்கப்படுகிறது.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
