தமிழ் திரையுலகில் கடந்த சில மாதங்களாகப் பேசுபொருளாக இருந்த ‘ஜனநாயகன்’ திரைப்படத்தின் சென்சார் சிக்கல் முடிவுக்கு வந்துள்ளது. முதலமைச்சர் விஜய் கதாநாயகனாக நடிக்கும் கடைசிப் படம் என்பதால், இப்படத்தின் மீதான எதிர்பார்ப்பு மற்ற படங்களை விடப் பன்மடங்கு அதிகமாக இருந்தது. கடந்த ஜனவரி மாதம் பொங்கல் பண்டிகையின் போது வெளியாக வேண்டிய இப்படம், சென்சார் வாரியத்தின் மறுஆய்வுக் குழு பரிந்துரை மற்றும் பல்வேறு சட்ட சிக்கல்களால் திரைக்கு வர முடியாமல் முடங்கியிருந்தது. தற்போது, அந்த அனைத்துத் தடைகளையும் கடந்து படம் ‘ஏ’ (A) சான்றிதழுடன் தணிக்கை செய்யப்பட்டுள்ளதாக அதிகாரபூர்வமற்ற தகவல்கள் வெளியாகியுள்ளன.
படம் சென்சார் ஆனதை அடுத்து, கேவிஎன் புரொடக்ஷன்ஸ் நிறுவனம் படத்தின் ரிலீஸ் பணிகளைத் தீவிரப்படுத்தியுள்ளது. தற்போது ஜூலை மற்றும் ஆகஸ்ட் மாதங்களில் திரையரங்குகள் ஏற்கனவே பல படங்கள் ரிலீஸாக வரிசை கட்டி நிற்பதால், ரிலீஸ் தேதியை நிர்ணயிப்பதில் படக்குழு சற்று குழப்பத்தில் உள்ளது. ஜூலை 16, 23, மற்றும் 31 ஆகிய தேதிகளில் ‘அன்பே டயானா’, ‘மகுடம்’, ‘இம்மார்டல்’, ‘டிசி’ மற்றும் ‘சிக்மா’ போன்ற படங்கள் ரிலீஸாக உள்ளன. இந்த நெருக்கடியான கால அட்டவணையில் படத்தை வெளியிட்டால் வசூல் பாதிக்கப்படலாம் என்று கருதும் படக்குழு, ஆகஸ்ட் 7-ஆம் தேதியை ஒரு ‘சேஃப் ஸ்லாட்’ ஆகக் கருதி அதைக் குறிவைத்துள்ளதாகக் கூறப்படுகிறது.
ஹெச். வினோத் இயக்கத்தில் விஜய், பூஜா ஹெக்டே, பாபி தியோல் எனப் பெரிய நட்சத்திரக் கூட்டமே நடித்துள்ள ‘ஜனநாயகன்’, முழுக்க முழுக்க ஒரு அரசியல் மற்றும் ஆக்ஷன் த்ரில்லர் கதையம்சம் கொண்டது. படம் ஏற்கனவே இணையதளங்களில் கசிந்திருந்தாலும், விஜய் ரசிகர்கள் அவரது கடைசித் திரைப் படைப்பைத் திரையரங்குகளில் காணத்தான் ஆவலாக உள்ளனர். ரிலீஸ் தேதி தொடர்பான அதிகாரப்பூர்வ அறிவிப்பு இன்னும் சில நாட்களில் வெளியாகும் என எதிர்பார்க்கப்படுகிறது. சென்சார் சான்றிதழ் கையில் கிடைத்த பிறகு, இந்தி மற்றும் தெலுங்கு மொழிகளில் சென்சார் formalities-ஐ முடித்து, உலகமெங்கும் பிரம்மாண்டமாகப் படத்தை வெளியிடத் தயாரிப்பு நிறுவனம் முனைப்பு காட்டி வருகிறது. நீண்ட போராட்டத்திற்குப் பிறகு ‘ஜனநாயகன்’ திரைக்கு வரவிருப்பது கோலிவுட் வட்டாரத்தில் பெரும் வரவேற்பைப் பெற்றுள்ளது.
