Ashwath Praises Superstar: ரஜினி சார் மாதிரி ஒரு இனிமையான மனிதரைப் பார்த்ததில்லை!: ‘தர்மன்’ ஷூட்டிங் அனுபவம் குறித்து இயக்குநர் அஷ்வத் மாரிமுத்து நெகிழ்ச்சி!

சூப்பர் ஸ்டார் ரஜினிகாந்த் (Rajinikanth) நடிப்பில், இளம் இயக்குநர் அஷ்வத் மாரிமுத்து (Ashwath Marimuthu) இயக்கத்தில் உருவாகிவரும் பிரம்மாண்டத் திரைப்படம் ‘தர்மன்’ (Dharman). இப்படத்தின் படப்பிடிப்புத் தள அனுபவங்கள் மற்றும் சூப்பர் ஸ்டாருடன் பணியாற்றியது குறித்து இயக்குநர் அஷ்வத் மாரிமுத்து சமீபத்திய பேட்டி ஒன்றில் மனம் திறந்து பல சுவாரஸ்யமான விஷயங்களைப் பகிர்ந்து கொண்டுள்ளார்.

இதுவரை இரண்டு கட்டப் படப்பிடிப்புகள் வெற்றிகரமாக முடிந்துள்ள நிலையில், வரும் அக்டோபர் மாதத்திற்குள் முழுப் படப்பிடிப்பும் முடிக்கப்பட உள்ளதாக அவர் தெரிவித்தார். இது குறித்து அவர் மேலும் கூறுகையில், “எனது முந்தைய படங்களின் ஹீரோக்களான அசோக் செல்வன் மற்றும் பிரதீப் ரங்கநாதன் ஆகியோர் எனது வயதுக்குட்பட்ட நண்பர்கள். ஆனால், ரஜினி சார் அளவுக்கு இவ்வளவு இனிமையான ஒரு மனிதரை நான் என் வாழ்நாளில் பார்த்ததே இல்லை. இயக்குநர் நெல்சன் சொன்னது போல அவர் ஒரு அற்புதமான மனிதர். நான் அவரை நெருங்கிச் செல்லும் போதெல்லாம் அவர் மரியாதையாக எழுந்து நிற்பார். ‘ஏன் சார் இப்படிச் செய்கிறீர்கள்?’ என்று கேட்டதற்கு, ‘இது இந்தக் கலை மற்றும் இயக்குநர் மீதான மரியாதைக்காக’ என்று கூறினார்” என நெகிழ்ச்சியுடன் குறிப்பிட்டார்.

மேலும் இப்படத்தில் ரஜினி முற்றிலும் ஒரு ‘ஜென் ஸி’ (Gen Z) வைப்பில், அனைவரும் ரசிக்கும் வகையில் கலக்கலாக வலம் வருவார் என்றும் அவர் உறுதிப்படுத்தியுள்ளார்.