தமிழக அரசியல் களம் தற்போது ‘தளபதி’ விஜய்யைச் சுற்றியே நகர்ந்து கொண்டிருக்கிறது. 2026 சட்டப்பேரவைத் தேர்தலில் 108 இடங்களைக் கைப்பற்றி தனிப்பெரும் கட்சியாக உருவெடுத்துள்ள விஜய்யின் ‘தமிழக வெற்றி கழகம்’ (TVK), ஆட்சி அமைப்பதற்கான முயற்சிகளில் தீவிரமாக ஈடுபட்டுள்ளது. இந்தச் சூழலில், விஜய்யுடன் ‘அழகிய தமிழ் மகன்’ திரைப்படத்தில் ஜோடியாக நடித்த பிரபல நடிகை ஸ்ரேயா சரண், விஜய்யின் அரசியல் பிரவேசம் குறித்து மிகவும் நேர்மறையான கருத்துக்களைப் பகிர்ந்துள்ளார்.
சமீபத்தில் ஒரு செய்தி ஊடகத்திற்கு அளித்த பேட்டியில் பேசிய ஸ்ரேயா, “நான் அறிந்த விஜய் ஒரு அரசியல்வாதி அல்ல, ஆனால் அவர் மக்களுக்காக மிகப்பெரிய மாற்றத்தைக் கொண்டு வருவார் என்று நான் நம்புகிறேன். பொதுவாகத் தேர்தல் நேரங்களில் பலரும் வாக்களிப்பதைத் தவிர்ப்பார்கள். ஆனால் விஜய் அரசியலுக்கு வந்த பிறகு, பல இடங்களில் மக்கள் ஆர்வமுடன் வாக்களிக்க முன்வந்துள்ளனர். இது சமூகத்தில் ஒரு நல்ல மாற்றத்தை ஏற்படுத்தும்” என்று தெரிவித்துள்ளார்.
மேலும், படப்பிடிப்புத் தளத்தில் நடந்த ஒரு நெகிழ்ச்சியான சம்பவத்தையும் ஸ்ரேயா நினைவு கூர்ந்துள்ளார். 45 டிகிரி வெயிலில் தங்களைக் காண வந்த ரசிகர்களுக்காக, கேரவனில் இருந்து வெளியே வந்து நீண்ட நேரம் நின்று அவர்களுடன் புகைப்படம் எடுத்துக்கொண்ட விஜய்யின் அந்தப் பண்புதான் இன்று அவரை இந்த உயரத்தில் அமரவைத்துள்ளது என்று ஸ்ரேயா புகழாரம் சூட்டியுள்ளார். “மக்களின் நலனுக்காக உழைக்கும் விஜய், மிகுந்த கருணையுடன் செயல்படுவார். அதேபோல் ஒரு அரசியல்வாதியாகவும் அவர் சிறப்பாகச் செயல்படுவார் என நம்புகிறேன்” என்று அவர் கூறியுள்ளார்.
தற்போது தமிழகத்தில் ஆட்சி அமைப்பதில் ஒரு இழுபறி நிலை நீடித்து வரும் வேளையில், திரையுலகைச் சேர்ந்த பலரும் விஜய்க்குத் தங்களது ஆதரவைத் தெரிவித்து வருகின்றனர். குறிப்பாக, இளைஞர்கள் மற்றும் முதல்முறை வாக்காளர்களின் ஆதரவு விஜய்க்குப் பெரிய பலமாக அமைந்துள்ளது. ஸ்ரேயா சரண் போன்ற முன்னணி நடிகைகளின் இத்தகைய கருத்துக்கள், விஜய்யின் அரசியல் பயணத்திற்கு மேலும் வலு சேர்க்கும் விதமாக அமைந்துள்ளது.
