நடிகர் அபீஷன் ஜீவிந்த் மற்றும் அனசுவரா ராஜன் நடிப்பில் வெளியான வித் லவ் வசூல் சாதனை குறித்த அதிகாரப்பூர்வ அறிவிப்பை தயாரிப்பு நிறுவனமான எம்ஆர்பி என்டர்டெயின்மென்ட்ஸ் (MRP Entertainments) வெளியிட்டுள்ளது. பிப்ரவரி 6-ஆம் தேதி திரையரங்குகளில் வெளியான இத்திரைப்படம், தனது முதல் மூன்று நாள் வார இறுதி முடிவில் உலகளவில் 11 கோடி ரூபாய்க்கும் அதிகமான மொத்த வசூலை (Gross) ஈட்டியுள்ளது. நட்சத்திர பட்டாளங்கள் இல்லாத சிறிய பட்ஜெட் படமாகத் தொடங்கி, தற்போது பாக்ஸ் ஆபீஸில் லாபகரமான வெற்றியை நோக்கி இப்படம் பயணிப்பது கோலிவுட் வட்டாரத்தில் ஆச்சரியத்தை ஏற்படுத்தியுள்ளது.
View this post on Instagram
இயக்குநர் மதன் இயக்கத்தில், ஷான் ரோல்டன் இசையமைப்பில் உருவான ‘வித் லவ்’ திரைப்படம், பள்ளிப் பருவ நினைவுகளையும் தற்காலக் காதலையும் மையமாகக் கொண்டு உருவானது. முதல் நாளில் 1.5 கோடி ரூபாய் வசூலுடன் தொடங்கிய இப்படம், ரசிகர்களிடையே நிலவிய நேர்மறையான விமர்சனங்கள் காரணமாக அடுத்தடுத்த நாட்களில் கணிசமான வளர்ச்சியைப் பதிவு செய்தது. குறிப்பாக, சனிக்கிழமை மற்றும் ஞாயிற்றுக்கிழமைகளில் தமிழகம் முழுவதும் உள்ள திரையரங்குகளில் 40 சதவீதத்திற்கும் அதிகமான இருக்கைகள் நிரம்பியதாகத் தகவல்கள் தெரிவிக்கின்றன.
சவுந்தர்யா ரஜினிகாந்தின் ‘ஜியான் ஃபிலிம்ஸ்’ நிறுவனத்துடன் இணைந்து எம்ஆர்பி என்டர்டெயின்மென்ட்ஸ் இப்படத்தைத் தயாரித்துள்ளது. காதலர் தின வாரத்தை முன்னிட்டு வெளியான இந்தப் படம், இளைஞர்களை மட்டுமின்றி குடும்ப ரசிகர்களையும் கவர்ந்து வருவதால் வார நாட்களிலும் வசூல் குறையாது என விநியோகஸ்தர்கள் எதிர்பார்க்கின்றனர். நெட்பிளிக்ஸ் ஓடிடி உரிமத்தைப் பெற்றுள்ள நிலையில், திரையரங்குகளில் இப்படத்திற்கு கிடைத்துள்ள இந்த 11 கோடி ரூபாய் வசூல் சாதனை, அறிமுக நாயகனாக அபீஷன் ஜீவிந்திற்கு திரையுலகில் ஒரு வலுவான தொடக்கத்தை அமைத்துக் கொடுத்துள்ளது.
