பாலிவுட்டின் பிரபல இயக்குநர் விக்ரம் பட், நடிகர் விஜய் மற்றும் திரிஷா குறித்து சமூக வலைதளங்களில் பரவி வரும் காதல் வதந்திகளுக்குத் தனது பகிரங்க ஆதரவைத் தெரிவித்துள்ளார். சமீபத்தில் தயாரிப்பாளர் கல்பாத்தி சுரேஷ் வீட்டுத் திருமண வரவேற்பு நிகழ்ச்சியில் விஜய் மற்றும் திரிஷா ஜோடியாகக் கலந்துகொண்டது இணையத்தில் பெரும் விவாதத்தை ஏற்படுத்திய நிலையில், “ஒவ்வொரு மனித இதயத்திற்கும் தனக்குப் பிடித்தமான இடத்தைத் தேடிச் செல்லவும், காதலிக்கவும் முழு உரிமை உண்டு” என விக்ரம் பட் அதிரடியாகப் பதிவிட்டுள்ளார்.
இந்தியத் திரையுலகில் குறிப்பாகப் பாலிவுட்டில் ‘குலாம்’ (Ghulam) மற்றும் ‘ராஸ்’ (Raaz) போன்ற மெகா ஹிட் த்ரில்லர் படங்களை இயக்கிய அனுபவம் கொண்ட விக்ரம் பட், இந்தியச் சினிமாவில் 3D தொழில்நுட்பத்தை அறிமுகப்படுத்திய முன்னோடிகளில் ஒருவராகக் கருதப்படுபவர். கடந்த காலங்களில் பலமுறை தனது தனிப்பட்ட வாழ்க்கை மற்றும் காதல் உறவுகள் குறித்து வெளிப்படையாகப் பேசிப் பல சர்ச்சைகளைச் சந்தித்தவர். குறிப்பாக, சமீபத்தில் ஒரு நிதி மோசடி வழக்கில் சிக்கி சுமார் 70 நாட்கள் உதய்பூர் சிறைவாசத்தை முடித்துவிட்டு பிணையில் வெளிவந்துள்ள அவர், தற்போது இந்த விவகாரத்தில் கருத்துத் தெரிவித்துள்ளது தேசிய அளவில் கவனத்தை ஈர்த்துள்ளது.
விஜய் மற்றும் அவரது மனைவி சங்கீதா இடையிலான விவாகரத்து தொடர்பான செய்திகள் ஊடகங்களில் பரபரப்பாகப் பேசப்பட்டு வரும் சூழலில், திரிஷாவுடன் அவர் ஒரே நிறத்தில் ஆடை அணிந்து திருமணத்திற்கு வந்தது பல தரப்பிலிருந்தும் விமர்சனங்களை ஈர்த்தது. இதுகுறித்துத் தனது இன்ஸ்டாகிராம் பக்கத்தில் நீண்ட பதிவு ஒன்றை வெளியிட்டுள்ள விக்ரம் பட், “விஜய் மற்றும் திரிஷாவின் தனிப்பட்ட வாழ்க்கை குறித்து இணையத்தில் பலத்த சலசலப்புகள் நிலவுகின்றன. அந்த வதந்திகள் உண்மையா இல்லையா என்பது எனக்குத் தெரியாது. ஆனால், அவை உண்மையாக இருக்கும் பட்சத்தில், சில விஷயங்களை நான் சொல்ல விரும்புகிறேன்” எனக் குறிப்பிட்டுள்ளார்.
View this post on Instagram
தனது சொந்த வாழ்க்கையில் தான் சந்தித்த சட்டப் போராட்டங்கள் மற்றும் அண்மைக்கால சிறைவாசத்தை மேற்கோள் காட்டிப் பேசிய அவர், “சமீபத்திய சிறைவாசம் எனக்குச் சுதந்திரத்தின் மதிப்பை உணர்த்தியுள்ளது. ஆனால், அதைவிடக் கொடுமையான சிறை என்பது மனித ஆன்மாவின் சிறைவாசம். காலாவதியான ஒரு உறவில் சமூகம் வற்புறுத்துகிறது என்பதற்காக இரண்டு பேர் வலுக்கட்டாயமாகச் சிக்கிக்கொண்டு வாழ்வதுதான் மிகப்பெரிய சிறை. மனித இதயம் எப்போதுமே தனக்கு மகிழ்ச்சி தரும் இடத்தைத் தேடித்தான் செல்லும். அங்குதான் அது சுதந்திரமாகச் சுவாசிக்கும்” எனத் தெரிவித்துள்ளார்.
மேலும், விஜய் மற்றும் திரிஷா தங்களது உறவை மறைக்காமல் பொதுவெளியில் தோன்றுவதை ஒரு துணிச்சலான செயலாக விக்ரம் பட் பார்த்துள்ளார். “காதலை ஏதோ பாவம் செய்வது போல் மறைக்காமல், கண்ணியத்துடன் வெளிப்படுத்துவதில் ஒரு கம்பீரம் இருக்கிறது. திரையில் அவர்கள் நமக்குச் சொந்தமானவர்கள், ஆனால் அவர்களின் தனிப்பட்ட வாழ்க்கை அவர்களுக்கு மட்டுமே சொந்தமானது. நாம் ஒரு கூட்டமாகச் சேரும்போது மற்றவர்களைத் தீர்ப்பு சொல்லும் நீதிபதிகளாக எளிதில் மாறிவிடுகிறோம். ஆனால், தனிப்பட்ட முறையில் அவர்கள் சந்திக்கும் வலிகளை நாம் உணர வேண்டும்” என அவர் நெகிழ்ச்சியுடன் பதிவிட்டுள்ளார்.
விஜய்யின் அரசியல் வருகை மற்றும் அவரது குடும்பப் பிரச்சனைகள் காரணமாகத் தமிழகத்தில் அவருக்கு எதிராகப் பல்வேறு விமர்சனங்கள் முன்வைக்கப்பட்டு வரும் வேளையில், வட இந்தியாவிலிருந்து விக்ரம் பட் கொடுத்துள்ள இந்த ஆதரவு குரல் கோலிவுட்டில் புதிய விவாதத்தை ஏற்படுத்தியுள்ளது. ஏற்கனவே இயக்குநர் பார்த்திபன் ‘குந்தவை வீட்டில் இருக்க வேண்டும்’ எனச் மறைமுகமாகச் சாடியதற்குத் திரிஷா ‘ஒரு மைக் கிடைத்தால் முட்டாள்தனம் சத்தமாகப் பேசும்’ எனப் பதிலடி கொடுத்திருந்தது குறிப்பிடத்தக்கது.
தற்போது விக்ரம் பட் போன்ற ஒரு மூத்த இயக்குநர், காதலுக்கான சுதந்திரத்தைப் பற்றிப் பேசியிருப்பது இணையத்தில் வைரலாகி வருகிறது. 2026-ம் ஆண்டின் தொடக்கமே விஜய் மற்றும் திரிஷாவிற்கான சர்ச்சைகளுடன் தொடங்கியுள்ள நிலையில், ரசிகர்கள் மற்றும் பிரபலங்கள் பலரும் இரு துருவங்களாகப் பிரிந்து தங்களது கருத்துகளைத் தெரிவித்து வருகின்றனர். ஒரு நட்சத்திரத்தின் தனிப்பட்ட வாழ்க்கையை அவரது திரைப் பிம்பத்தோடு இணைத்துப் பார்ப்பது சரியானதா என்கிற கேள்வியையும் விக்ரம் பட்டின் இந்தப் பதிவு எழுப்பியுள்ளது.
