தமிழக அரசியல் வரலாற்றில் 2026 சட்டமன்றத் தேர்தல் ஒரு மிகப்பெரிய நிலநடுக்கத்தை ஏற்படுத்தியுள்ளது என்றுதான் சொல்ல வேண்டும். சுமார் 50 ஆண்டுகாலமாக தமிழகத்தை மாறி மாறி ஆட்சி செய்து வந்த திராவிடக் கோட்டைகளை ஒற்றை ஆளாகத் தகர்த்து எறிந்துள்ளார் நடிகர் விஜய். தனது தமிழக வெற்றிக் கழகம் (TVK) மூலம் 108 தொகுதிகளைக் கைப்பற்றி, தமிழகத்தின் தனிப்பெரும் கட்சியாக அவர் உருவெடுத்துள்ள நிலையில், இந்தியத் திரையுலகின் சர்ச்சைக்குரிய இயக்குனர் ராம் கோபால் வர்மா (RGV) பதிவிட்டுள்ள ஒரு ட்வீட் இப்போது காட்டுத்தீயாய் பரவி வருகிறது.
கலைஞரின் பின்னாடி நின்ற அந்த சிறுவன்: இயக்குனர் ராம் கோபால் வர்மா தனது எக்ஸ் (X) தளத்தில் ஒரு பழைய புகைப்படத்தைப் பகிர்ந்துள்ளார். அதில் மறைந்த முன்னாள் முதல்வர் கலைஞர் கருணாநிதி அவர்களுக்குப் பின்னால் மிகத் தணிவாக ஒரு சிறுவன் நின்று கொண்டிருக்கிறான். அந்தச் சிறுவன் வேறு யாருமல்ல, இன்றைய அரசியல் மாற்றத்தின் நாயகன் விஜய் தான். இந்தப் புகைப்படத்தைப் பகிர்ந்துள்ள ஆர்ஜிவி, “அன்று தன் பின்னால் நின்று கொண்டிருந்த இந்தச் சிறுவன், ஒரு நாள் தனது கட்சியையே காலி செய்வான் என்று கலைஞர் கனவிலும் நினைத்திருக்க மாட்டார்” என்று பதிவிட்டுள்ளார். இது அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.
Kalaingar wouldn’t have dreamed that the kid behind him would one day destroy his party 🙏👍🔥 pic.twitter.com/7NNp6Ge73S
— Ram Gopal Varma (@RGVzoomin) May 5, 2026
35 சதவீத வாக்கு வங்கி: எம்ஜிஆரின் சாதனையை முறியடித்த விஜய் – இந்த 2026 தேர்தலில் விஜய் படைத்துள்ள சாதனை சாதாரணமானது அல்ல. 1977-ல் எம்.ஜி.ஆர் அவர்கள் தனது அறிமுகத் தேர்தலில் 33.52 சதவீத வாக்குகளைப் பெற்று சாதனை படைத்திருந்தார். அந்த நீண்டகால சாதனையை தற்போது 35 சதவீத வாக்குகளைப் பெற்று விஜய் முறியடித்துள்ளார். தென்னிந்திய அரசியலிலேயே என்.டி.ஆருக்குப் பிறகு அறிமுகத் தேர்தலில் இவ்வளவு பெரிய தாக்கத்தை ஏற்படுத்திய ஒரே தலைவராக விஜய் உருவெடுத்துள்ளார். 108 இடங்களை வென்றுள்ள விஜய், திராவிட அரசியலின் அஸ்திவாரத்தை ஆட்டிப் பார்த்துள்ளார்.
ஆட்சி அமைப்பதில் நீடிக்கும் சஸ்பென்ஸ்: விஜய்யின் தவெக 108 இடங்களைப் பெற்று தனிப்பெரும் கட்சியாக இருந்தாலும், ஆட்சி அமைக்கத் தேவையான 118 இடங்களை எட்ட இன்னும் 10 இடங்கள் தேவைப்படுகின்றன. இதனால் தமிழகத்தில் ஒரு தொங்கு சட்டசபை சூழல் உருவாகியுள்ளது. முதல்வர் மு.க. ஸ்டாலின் அவர்கள் தனது சொந்தத் தொகுதியிலேயே தோல்வியைத் தழுவியதும், திமுக வெறும் 59 இடங்களுக்குத் தள்ளப்பட்டதும், அக்கட்சிக்கு மிகப்பெரிய பின்னடைவாகக் கருதப்படுகிறது. ஆர்ஜிவி சொன்னது போல, ஒரு கால கட்டத்தில் திமுக-விற்கு ஆதரவாக இருந்த ஒரு குடும்பத்தில் இருந்து வந்த சிறுவன், இன்று அந்தக் கட்சியையே வீழ்த்தும் நிலைக்கு உயர்ந்திருப்பது காலத்தின் விசித்திரமான சுழற்சிதான்.
