‘போர் தொழில்’ என்ற பிளாக்பஸ்டர் வெற்றிப் படத்தின் மூலம் ஒட்டுமொத்த தென்னிந்திய திரையுலகையும் திரும்பிப் பார்க்க வைத்த இயக்குனர் விக்னேஷ் ராஜா, தற்போது தனது இரண்டாவது படத்தில் தனுஷுடன் கைகோர்த்துள்ளார். ‘கர’ (Kara) என்று பெயரிடப்பட்டுள்ள இந்தப் படம், 1991-ம் ஆண்டு காலகட்டத்தில் ராமநாதபுரம் பின்னணியில் நடக்கும் ஒரு அதிரடி சர்வைவல் த்ரில்லராக உருவாகியுள்ளது. வரும் ஏப்ரல் 30, 2026 அன்று வெளியாகவுள்ள இந்தப் படத்தின் புரோமோஷன் பணிகள் தற்போது சூடுபிடித்துள்ள நிலையில், தனுஷுடன் பணியாற்றிய அனுபவம் குறித்து விக்னேஷ் ராஜா பல அதிரடியான உண்மைகளை வெளிப்படுத்தியுள்ளார்.
சினிமா உலகில் ஒரு டாப் ஸ்டாராக இருக்கும் தனுஷ், பொதுவாக தனது படங்களில் ‘மாஸ்’ எலிமெண்ட்டுகள் இருக்க வேண்டும் என்று விரும்புவார் எனப் பலரும் நினைப்பதுண்டு. ஆனால், ‘கர’ படப்பிடிப்பின் போது தனுஷ் எடுத்த ஒரு முடிவு விக்னேஷ் ராஜாவை ஆச்சரியத்தில் ஆழ்த்தியுள்ளது. “தனுஷ் சார் என்னிடம் ஆரம்பத்திலேயே ஒன்றை மிகத் தெளிவாகச் சொன்னார். ‘விக்னேஷ், என்னை ஒரு ஹீரோவாகக் காட்ட வேண்டும் என்பதற்காக எதையும் வலுக்கட்டாயமாகச் செய்ய வேண்டாம். இந்தக் கதையிலேயே ஒரு ஹீரோயிசம் இருக்கிறது, அதுவே போதும். நாம் அந்தத் திரைக்கதைக்குள்ளேயே மட்டும் வேலை செய்வோம்’ என்று அவர் கூறினார்” என விக்னேஷ் ராஜா நெகிழ்ச்சியுடன் தெரிவித்துள்ளார். ஒரு பெரிய நட்சத்திரமாக இருந்தும், கதையின் நம்பகத்தன்மைக்காகத் தன்னை முன்னிலைப்படுத்திக் கொள்ளாத தனுஷின் இந்தத் தன்மை படக்குழுவினருக்கு மிகப்பெரிய உத்வேகத்தைக் கொடுத்துள்ளது.
தனுஷின் நடிப்புத் திறன் குறித்து எடிட்டிங் அறையில் (Edit Room) தான் கண்ட அதிசயத்தைப் பற்றியும் இயக்குனர் விவரித்துள்ளார். “பொதுவாக ஒரு காட்சிக்கு நான் 10 வரி வசனங்கள் எழுதிக் கொடுத்தால், தனுஷ் சார் தனது மிரட்டலான முகபாவனைகள் மூலமாகவே அந்த வசனங்கள் சொல்ல வேண்டிய உணர்வை விட பல மடங்கு அதிகமான தாக்கத்தை ஏற்படுத்தி விடுவார். எடிட்டிங் செய்யும் போது அதைப் பார்க்கும் போது எனக்கே சிலிர்ப்பாக இருந்தது. நாம் ஒரு இயக்குனராக அவரிடம் இருந்து என்ன எதிர்பார்க்கிறோமோ, அதை விடப் பல மடங்கு மேலாக அவரது பெர்பார்மன்ஸ் (Performance) எப்போதும் இருக்கும்” என்று விக்னேஷ் ராஜா புகழாரம் சூட்டியுள்ளார்.
ராமநாதபுரத்தின் வறண்ட நிலப்பரப்பு, 1991-ல் நிலவிய அந்தப் பதற்றமான சூழல் என அனைத்தையும் உள்வாங்கி ‘கரசாமி’ என்ற கதாபாத்திரத்தில் தனுஷ் வாழ்ந்துள்ளார் என்பது சமீபத்தில் வெளியான ‘ஃபேசஸ் ஆஃப் கர’ (Faces of Kara) வீடியோவிலேயே உறுதியானது. “வசனங்களை விட மௌனத்தின் மூலமாகவும், கண்களின் மூலமாகவும் ஒரு கதையை எப்படி நகர்த்த முடியும் என்பதை தனுஷ் சாரிடம் இருந்து கற்றுக் கொண்டேன். அவருக்கு என்று ஒரு தனித்துவமான ஸ்டைல் இருக்கிறது. அதை நேரில் பார்த்து அனுபவித்தது ஒரு இயக்குனராக எனக்குக் கிடைத்த வரம்” என்று விக்னேஷ் ராஜா கூறியுள்ளார். ரெட் ஜெயண்ட் மூவீஸ் வெளியிடும் இந்தப் படம், தனுஷின் கேரியரில் மீண்டும் ஒரு தேசிய விருதுக்கான வாய்ப்பை உருவாக்கும் என்று கோலிவுட் வட்டாரத்தில் பேசப்படுகிறது.
கிரிஷ். இவர் டிஜிட்டல் செய்தி துறையில் துறையில் 5 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள செய்தி பிரிவில் பணியாற்றிய அனுபவம் கொண்டவர். சினிமா, விளையாட்டு சார்ந்த செய்திகள் வழங்குவதில் ஆர்வம் உள்ளவர்.
