தமிழ் சினிமாவின் முன்னணி தயாரிப்பு நிறுவனமான ஏஜிஎஸ் என்டர்டெயின்மென்ட் (AGS Entertainment), தனது அடுத்த பிரம்மாண்ட படைப்பான ‘பிளாஸ்ட்’ (Blast) திரைப்படத்தின் வெளியீட்டுத் தேதியை அதிகாரப்பூர்வமாக அறிவித்துள்ளது. ‘ஆக்ஷன் கிங்’ அர்ஜுன் சர்ஜா (Arjun Sarja) முன்னணி கதாபாத்திரத்தில் நடித்துள்ள இப்படம் வரும் மே 28, 2026 அன்று திரையரங்குகளில் வெளியாகவுள்ளது. கோடை விடுமுறை முடிவதற்குள் ரசிகர்களுக்கு ஒரு அதிரடியான விருந்தாக இந்தப் படம் அமையும் என்பதில் சந்தேகமில்லை.
இப்படம் சென்சார் சோதனைகளைக் கடந்து தற்போது ‘UA’ சான்றிதழைப் பெற்றுள்ளது. இது அனைத்துத் தரப்பு ரசிகர்களும் கண்டு ரசிக்கும் வகையில் ஆக்ஷன் கலந்த விறுவிறுப்பான திரில்லராக இருக்கும் என்பதை உறுதி செய்கிறது. மேலும், இப்படத்தின் சர்வதேச வெளியீட்டு உரிமையை (Overseas Release) பிரபல விநியோக நிறுவனமான பார்ஸ் ஃபிலிம்ஸ் (Phars Film) கைப்பற்றியுள்ளது. இதன் மூலம் உலகம் முழுவதும் ஒரே நேரத்தில் இந்தப் படம் வெளியாவது உறுதி செய்யப்பட்டுள்ளது. குறிப்பாக மத்திய கிழக்கு மற்றும் ஐரோப்பிய நாடுகளில் அதிகத் திரையரங்குகளில் படம் திரையிடப்பட உள்ளது.
View this post on Instagram
இயக்குநர் சுபாஷ் கே. ராஜ் இயக்கத்தில் உருவாகியுள்ள இப்படத்தில் அர்ஜுனுடன் இணைந்து பிரீத்தி முகுந்தன், அபிராமி, விவேக் பிரசன்னா, வினோத் சாகர் உள்ளிட்ட பலர் நடித்துள்ளனர். குறிப்பாக, ‘கே.ஜி.எஃப்’ படப் புகழ் ரவி பஸ்ரூர் (Ravi Basrur) இப்படத்திற்கு இசையமைத்திருப்பது படத்தின் மீதான எதிர்பார்ப்பை பல மடங்கு அதிகரித்துள்ளது. பின்னணி இசையில் அவர் காட்டும் மிரட்டல், தியேட்டர்களில் அதிர்வுகளை ஏற்படுத்தும். ஃபீனிக்ஸ் பிரபுவின் அதிரடி சண்டைக்காட்சிகளும், ரவி பஸ்ரூரின் பின்னணி இசையும் ஒரு முழுமையான மாஸ் அனுபவத்தைக் கொடுக்கும் என ஏஜிஎஸ் நிறுவனம் நம்பிக்கை தெரிவித்துள்ளது.
கல்பதி எஸ். அகோரம், கல்பதி எஸ். கணேஷ் மற்றும் கல்பதி எஸ். சுரேஷ் ஆகியோர் தயாரித்துள்ள ‘பிளாஸ்ட்’, மே 28 முதல் உலகமெங்கும் உள்ள திரையரங்குகளில் பட்டையைக் கிளப்பத் தயாராகிவிட்டது. நடிகர் அர்ஜுனின் நீண்ட கால இடைவேளைக்குப் பிறகு வெளியாகும் முழுநீள ஆக்ஷன் படம் என்பதால், அவரது ரசிகர்கள் பெரும் ஆவலுடன் காத்திருக்கின்றனர்.
