மலையாள திரையுலகில் வெளியாகும் திரைப்படங்கள் தற்பொழுது தங்களது அசாத்தியமான கதைக்களத்தால் ஒட்டுமொத்த தென்னிந்திய ரசிகர்களையும் கவர்ந்து வருகின்றன. அந்த வகையில் கடந்த மே மாதம் தியேட்டர்களில் வெளியாகி, உலகம் முழுவதும் 50 கோடி ரூபாய்க்கும் மேல் வசூலித்து மாபெரும் பிளாக்பஸ்டர் ஹிட்டடித்த திரைப்படம் தான் “அதிரடி” (Athiradi). மின்னல் முரளி திரைப்படத்திற்குப் பிறகு டோவினோ தாமஸ் மற்றும் பேசில் ஜோசப் ஆகிய இருவரும் மீண்டும் இணைந்து நடித்துள்ள இந்த ஆக்ஷன் கமெடி திரைப்படத்தின் ஓடிடி (OTT) ரிலீஸ் தேதி தற்பொழுது அதிகாரப்பூர்வமாக அறிவிக்கப்பட்டு ரசிகர்களை செம குஷியாக்கியுள்ளது.
பிரபல ஓடிடி நிறுவனமான சோனி லிவ் (SonyLIV) தங்களது அதிகாரப்பூர்வ சமூக வலைதளப் பக்கத்தில் இந்த படத்தின் மாஸ் போஸ்டரைப் பகிர்ந்து, வருகிற ஜூன் மாதம் 19ஆம் தேதி முதல் அதிரடி திரைப்படம் தங்களது தளத்தில் பிரத்யேகமாக ஸ்ட்ரீமிங் செய்யப்பட உள்ளதாக அதிகாரப்பூர்வமாக அறிவித்துள்ளது. அறிமுக இயக்குநர் அருண் அனிருதன் இயக்கத்தில் உருவான இந்த திரைப்படத்தில் டோவினோ தாமஸ், பேசில் ஜோசப் ஆகியோருடன் இணைந்து வினீத் ஸ்ரீனிவாசன், ரியா ஷிபு, ஷான் ரஹ்மான் மற்றும் தர்ஷனா ராஜேந்திரன் என ஒரு பெரிய நட்சத்திர பட்டாளமே நடித்துள்ளனர்.
View this post on Instagram
கல்லூரி வளாகத்தில் நடக்கும் மாணவர்களின் மோதல், திருவிழா கொண்டாட்டங்கள் மற்றும் இரண்டு முக்கிய கதாபாத்திரங்களுக்கு இடையே வெடிக்கும் கடுமையான இகோ (Ego) யுத்தத்தை மையமாகக் கொண்டு மிகவும் கலகலப்பான மற்றும் விறுவிறுப்பான கமர்ஷியல் பாணியில் இந்த படம் உருவாக்கப்பட்டுள்ளது. தியேட்டர்களில் பார்க்கத் தவறிய ரசிகர்களுக்காகவும், மீண்டும் இந்த எண்டர்டெய்னர் திரைப்படத்தைக் கொண்டாட நினைப்பவர்களுக்காகவும் ஜூன் 19 முதல் இந்த படம் ஓடிடிக்கு வரவுள்ளதால் தற்போதே சினிமா ரசிகர்கள் மத்தியில் சோனி லிவ் பக்கத்தின் மீதான எதிர்பார்ப்பு பல மடங்கு அதிகரித்துள்ளது.
