லட்டு தொடர்பாக சர்ச்சையான வீடியோவை வெளியிட்ட பரிதாபங்கள் youtube சேனல் மீது பாஜக புகார் கொடுத்திருந்த நிலையில் அதை திரும்ப பெற்றுள்ளது.
திருப்பதியில் பிரசாதமாக வழங்கப்பட்டு வரும் லட்டு தயாரிப்பதற்கு பயன்படுத்தப்பட்டு வரும் நெய்யில் விலங்குகளின் கொழுப்புகள் கலந்துள்ளதாக புகார் எழுந்தது. இது அதிகாரப்பூர்வமாக நிரூபிக்கப்பட்டது மேலும் சர்ச்சையை ஏற்படுத்தியிருந்தது. இந்த விவகாரம் தொடர்பாக பிரபல யுடியூபர்கள் கோபி மற்றும் சுதாகர் இணைந்து நடத்திவரும் பரிதாபங்கள் சேனலில் லட்டு பரிதாபங்கள் என்ற பெயரில் ஒரு வீடியோ வெளியானது.
ஆனால் அந்த வீடியோ வெளியிட்ட சில மணி நேரங்களிலேயே அந்த வீடியோ நீக்கப்பட்டது லட்டு பரிதாபங்கள் வீடியோ நீக்கப்பட்டது. தொடர்பாக யூடியூப் சேனலின் எக்ஸ் பக்கத்தில் பரிதாபங்கள் விளக்கம் அளித்தது. அதில் கடைசியாக பரிதாபங்கள் சேனலில் வெளியான வீடியோ முழுக்க முழுக்க நகைச்சுவைக்காக உருவாக்கப்பட்டது.
யார் மனதையும் புண்படுத்தும் நோக்கில் உருவாக்கப்படவில்லை. அதையும் மீறி சிலர் மனம் புண்பட்டிருந்தால் அதற்கு வருத்தம் தெரிவித்து சம்பந்தப்பட்ட காணொளியை நீக்கியுள்ளோம். இது போல் வரும் காலங்களில் நடைபெறாது என்பதை தெரிவித்துக் கொள்கின்றோம் என அறிவித்திருந்தது. இருப்பினும் இந்த வீடியோவை பலரும் பார்த்திருப்பதால் இந்துக்களின் உணர்வுகள் புண்பட்டதாக கூறி பரிதாபங்கள் youtube சேனல் மீது தமிழக பாஜக சார்பில் புகார் கொடுக்கப்பட்டிருந்தது.
இந்நிலையில் லட்டு வீடியோவுக்காக தமிழ்நாடு பாஜக ஒருங்கிணைப்பு குழு தலைவர் எச் ராஜாவிடம் கோபி மற்றும் சுதாகர் தொலைபேசி வாயிலாக பேசி மன்னிப்பு கேட்டிருக்கிறார்கள். இதனால் அந்த சேனல் மீதான புகாரை திரும்ப பெற முடிவு செய்திருப்பதாக பாஜக நிர்வாகி அமர் பிரசாத் ரெட்டி தெரிவித்திருக்கின்றார்.
