தமிழ் சினிமாவின் மோஸ்ட் அவேட்டெட் ஸ்பை ஆக்ஷன் த்ரில்லராக உருவாகியுள்ள ‘சர்தார் 2’ திரைப்படத்தின் அதிரடியான டீசர் தற்போது வெளியாகியுள்ளது. “The Hunt just got Bigger and Rules don’t apply anymore” என்ற டேக்லைனுடன் வெளியாகியுள்ள இந்த டீசர், சினிமா வட்டாரங்களில் மற்றும் ரசிகர்களிடையே மிகப்பெரிய எதிர்பார்ப்பை ஏற்படுத்தியுள்ளது. இப்படம் வருகிற செப்டம்பர் 10, 2026 அன்று உலகளாவிய திரையரங்குகளில் பிரம்மாண்டமாக வெளியாகவுள்ளது.
பிரின்ஸ் பிக்சர்ஸ் (Prince Pictures) மற்றும் ஐவி என்டர்டெயின்மென்ட் (IVY Entertainment) தயாரிப்பில், இயக்குநர் பி.எஸ். மித்தரன் இப்படத்தை இயக்கியுள்ளார். முதல் பாகத்தின் மாபெரும் வெற்றியைத் தொடர்ந்து, இரண்டாம் பாகம் அதைவிட பல மடங்கு பிரம்மாண்டமான முறையில் பான்-இந்தியா (Pan-India) அளவில் தயாராகியுள்ளது. இப்படத்தில் நடிகர் கார்த்தி தந்தை மற்றும் மகன் என இரட்டை வேடங்களில் மிரட்டலான ஸ்பை ஏஜெண்டுகளாக களமிறங்குகிறார்.
இப்படத்தில் கார்த்தியுடன் இணைந்து எஸ்.ஜே. சூர்யா மிரட்டலான வில்லன் கதாபாத்திரமான ‘பிளாக் டேக்கர்’ (Black Dagger) என்ற வேடத்தில் நடித்துள்ளார். இவர்களுடன் மாளவிகா மோகனன், ஆஷிகா ரங்கநாத், ரஜிஷா விஜயன், யோகி பாபு உள்ளிட்ட பல முன்னணி நட்சத்திரங்கள் இணைந்துள்ளனர். சாம் சி.எஸ் இசையமைத்துள்ள இப்படத்திற்கு ஜார்ஜ் சி. வில்லியம்ஸ் ஒளிப்பதிவு செய்துள்ளார்.
டீசரின் தொடக்கத்திலேயே விமானத்தில் நடக்கும் அதிரடி சண்டைக்காட்சியும், எஸ்.ஜே. சூர்யாவின் மாஸான டைலாக்குகளும் படத்தின் தரத்தை உயர்த்தியுள்ளன. நல்லவர்களுக்கு எதிரான கெட்ட வில்லன்கள் மற்றும் ஹீரோக்களுக்கு இடையேயான மோதலை மையமாகக் கொண்டு உருவாகியுள்ள இப்படம், செப்டம்பர் மாத விடுமுறை நாட்களில் பாக்ஸ் ஆபிஸில் மிகப்பெரிய சாதனைகளை படைக்கும் என எதிர்பார்க்கப்படுகிறது.
