தென்னிந்தியத் திரையுலகில் லேடி சூப்பர் ஸ்டார் அந்தஸ்துக்கு இணையாகத் தனக்கென ஒரு தனிப் பாதையை உருவாக்கி வைத்திருப்பவர் நடிகை சாய் பல்லவி. கமர்ஷியல் படங்களில் கவர்ச்சி காட்டாமல், நடிப்புக்கு முக்கியத்துவம் உள்ள கதைகளை மட்டுமே தேர்ந்தெடுத்து நடிக்கும் அவரது பாணிக்கு மிகப்பெரிய ரசிகர் பட்டாளமே உள்ளது. இந்நிலையில், இயக்குநர் ரத்னகுமார் இயக்கத்தில் மிகப்பெரிய ஹிட்டான ‘மேயாத மான்’ திரைப்படத்தில் சாய் பல்லவி நடிக்க மறுத்ததற்கான பின்னணி குறித்து தற்போது சுவாரசியமான தகவல்கள் வெளியாகியுள்ளன.
இயக்குநர் ரத்னகுமார் சமீபத்திய பேட்டி ஒன்றில் மேயாத மான் படத்தின் ஆரம்பக்கட்ட பணிகள் குறித்து பேசும்போது, இந்தப் படத்தில் முதலில் மது என்கிற கதாபாத்திரத்தில் நடிக்க சாய் பல்லவியைத்தான் அணுகியதாகத் தெரிவித்துள்ளார். கதை கேட்ட சாய் பல்லவிக்கு ஸக்ரிப்ட் மிகவும் பிடித்துப் போய்விட்டதாம். ஆனாலும், சில குறிப்பிட்ட காரணங்களால் தன்னால் இந்தப் படத்தில் நடிக்க முடியாது என்று அவர் மென்மையாக மறுப்பு தெரிவித்துவிட்டாராம்.
சாய் பல்லவியின் இந்த முடிவுக்குப் பின்னால் இருந்த மிக முக்கியமான காரணம் அவரது கொள்கைதான். படத்தின் கதையில் நாயகனும் நாயகியும் திருமணத்திற்கு முன்பே மிகவும் நெருக்கமான காட்சிகளில் நடிப்பது போலவும், சில முதிர்ச்சியான ரொமான்டிக் காட்சிகள் இருந்ததாகவும் சொல்லப்படுகிறது. அந்தச் சமயத்தில் இது போன்ற காட்சிகளில் நடிக்க சாய் பல்லவிக்கு உடன்பாடு இல்லாததால், அந்தப் படத்தைத் தவிர்த்துவிட்டார்.
இதே போன்ற ஒரு சம்பவம் இயக்குநர் மணிரத்னம் இயக்கத்தில் உருவான ‘காற்று வெளியிடை’ படத்திலும் நடந்துள்ளது. அந்தப் படத்தில் கதாநாயகி திருமணத்திற்கு முன்பே தாயாவது போன்ற காட்சிகள் இருந்ததால், மணிரத்னம் போன்ற பெரிய இயக்குநரின் படமாக இருந்தாலும் சாய் பல்லவி தனது கொள்கைக்காக அந்த வாய்ப்பையும் வேண்டாமென கூறியுள்ளார். தனது கேரியரின் ஆரம்பத்திலிருந்தே அவர் தனது தனிப்பட்ட எல்லைகளை மீறாமல் இருப்பதில் எவ்வளவு உறுதியாக இருந்தார் என்பதை இது காட்டுகிறது.
சாய் பல்லவி நோ சொன்ன பிறகுதான் அந்த வாய்ப்பு பிரியா பவானி சங்கருக்குச் சென்றது. இதன் மூலம் சின்னத்திரையிலிருந்து வெள்ளித்திரைக்குள் நுழைந்த பிரியா பவானி சங்கர், இன்று கோலிவுட்டின் முன்னணி நடிகைகளில் ஒருவராக வலம் வருகிறார். சாய் பல்லவியின் இந்த நேர்மையான அணுகுமுறை மற்றும் படத் தேர்வுகள் தான் இன்றும் அவரை மற்ற நடிகைகளிடமிருந்து தனித்துக் காட்டுகிறது.
பெரிய இயக்குநர்கள் அல்லது மெகா பட்ஜெட் படங்கள் என்பதற்காகத் தனது கொள்கைகளை விட்டுக்கொடுக்காத சாய் பல்லவியின் இந்த குணம் சினிமா வட்டாரத்தில் அவருக்குப் பெரும் மரியாதையைத் தேடித் தந்துள்ளது. தற்போது அவர் சிவகார்த்திகேயனுடன் இணைந்து நடித்துள்ள ‘அமரன்’ திரைப்படம் மற்றும் ராமாயணம் உள்ளிட்ட பெரிய ப்ராஜெக்ட்களில் பிஸியாக இருக்கும் வேளையில், பழைய படங்களை அவர் நிராகரித்ததற்கான காரணங்கள் இணையத்தில் பேசுபொருளாக மாறியுள்ளன.
கிரிஷ். இவர் டிஜிட்டல் செய்தி துறையில் துறையில் 5 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள செய்தி பிரிவில் பணியாற்றிய அனுபவம் கொண்டவர். சினிமா, விளையாட்டு சார்ந்த செய்திகள் வழங்குவதில் ஆர்வம் உள்ளவர்.
