தமிழ் திரையுலகின் பிரபல இசையமைப்பாளரும், தொகுப்பாளருமான ஜேம்ஸ் வசந்தனுக்கு சென்னையில் நேர்ந்த கசப்பான அனுபவம் சமூக வலைதளங்களில் விவாதமாகியுள்ளது. சென்னை கொட்டிவாக்கம் பகுதியில் உள்ள உணவகம் ஒன்றிற்கு ஜேம்ஸ் வசந்தன் சாப்பிடச் சென்றுள்ளார். அப்போது தனது காரை உணவகத்திற்கு வெளியே ஓரிடத்தில் நிறுத்திவிட்டுச் சென்றுள்ளார்.
சாப்பிட்டு முடித்துவிட்டு அவர் திரும்பி வந்து பார்த்தபோது, அவரது காரின் கண்ணாடி மர்ம நபர்களால் அடித்து உடைக்கப்பட்டிருப்பதைக் கண்டு அதிர்ச்சியடைந்தார். காரின் உள்ளே இருந்த பொருட்கள் ஏதேனும் திருடப்பட்டதா அல்லது வேண்டுமென்றே காழ்ப்புணர்ச்சி காரணமாக இந்தத் தாக்குதல் நடத்தப்பட்டதா என்பது குறித்து இன்னும் தெளிவான தகவல்கள் வெளியாகவில்லை.
இது குறித்து ஜேம்ஸ் வசந்தன் உடனடியாக அருகில் உள்ள காவல் நிலையத்தில் புகார் அளித்துள்ளார். அவரது புகாரைப் பெற்றுக்கொண்ட போலீசார், சம்பவ இடத்திற்கு விரைந்து வந்து விசாரணை மேற்கொண்டனர். கொட்டிவாக்கம் பகுதியில் உள்ள அந்த உணவகம் மற்றும் அதனைச் சுற்றியுள்ள பகுதிகளில் பொருத்தப்பட்டுள்ள சிசிடிவி (CCTV) கேமரா காட்சிகளை போலீசார் தற்போது ஆய்வு செய்து வருகின்றனர். மக்கள் நடமாட்டம் அதிகம் உள்ள பகுதியில் ஒரு பிரபலத்தின் கார் கண்ணாடி உடைக்கப்பட்ட சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது. விரைவில் குற்றவாளிகள் கைது செய்யப்படுவார்கள் என போலீசார் தரப்பில் தெரிவிக்கப்பட்டுள்ளது.
கிரிஷ். இவர் டிஜிட்டல் செய்தி துறையில் துறையில் 5 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள செய்தி பிரிவில் பணியாற்றிய அனுபவம் கொண்டவர். சினிமா, விளையாட்டு சார்ந்த செய்திகள் வழங்குவதில் ஆர்வம் உள்ளவர்.
