லோகேஷ் கனகராஜ் அடுத்த படங்கள் குறித்த எதிர்பார்ப்பு சினிமா ரசிகர்களிடையே தற்போது உச்சத்தை எட்டியுள்ளது. தமிழ் சினிமாவின் முன்னணி இயக்குனரான லோகேஷ் கனகராஜ், ரஜினிகாந்தின் ‘கூலி’ படத்திற்குப் பிறகு தனது அடுத்த திட்டங்களை, சென்னையில் நடைபெற்ற செய்தியாளர் சந்திப்பில் அதிகாரப்பூர்வமாக உறுதிப்படுத்தினார். இதில் ‘கைதி 2’ மற்றும் தெலுங்கு நடிகர் அல்லு அர்ஜுன் உடனான கூட்டணி குறித்த முக்கிய தகவல்கள் இடம்பெற்றுள்ளன.
அல்லு அர்ஜுனுடன் புதிய கூட்டணி (AA23)
இயக்குநர் லோகேஷ் கனகராஜ் தற்போது தனது அடுத்த மெகா ப்ராஜெக்ட்டாக தெலுங்கு சூப்பர் ஸ்டார் அல்லு அர்ஜுனுடன் இணைய உள்ளார். இது லோகேஷின் நேரடி தெலுங்கு அறிமுகமாகும். இந்தப் படத்திற்காக மைத்திரி மூவி மேக்கர்ஸ் நிறுவனத்திடம் முன்பே ஒப்பந்தம் செய்யப்பட்டிருந்ததாகவும், தற்போது அதற்கான திரைக்கதை பணிகள் தீவிரமாக நடைபெற்று வருவதாகவும் அவர் தெரிவித்துள்ளார்.
கைதி 2 மற்றும் LCU அப்டேட்
சமீப நாட்களில் ‘கைதி 2’ திரைப்படம் கைவிடப்பட்டதாக வெளியான வதந்திகளுக்கு லோகேஷ் முற்றுப்புள்ளி வைத்துள்ளார். அல்லு அர்ஜுன் படத்தை முடித்த கையோடு, கார்த்தி நடிக்கும் ‘கைதி 2’ பணிகளைத் தொடங்க உள்ளதாக அவர் உறுதிப்படுத்தினார்.
“LCU என்பது ரசிகர்களால் உருவானது, அதை அவ்வளவு சீக்கிரம் முடித்துவிட முடியாது. கைதி 2, விக்ரம் 2 மற்றும் ரோலக்ஸ் படத்திற்கான தனித் திரைப்படம் ஆகியவை எனது அடுத்தடுத்த இலக்குகள்” என்று லோகேஷ் நெகிழ்ச்சியுடன் குறிப்பிட்டார்.
இதில், மற்றொரு சுவாரஸ்யமான தகவல் என்னவென்றால், தளபதி விஜய்யின் கடைசி படமான ‘ஜனநாயகன்’ திரைப்படத்தில் லோகேஷ் கனகராஜ் ஒரு சிறப்பு தோற்றத்தில் (Cameo) நடித்துள்ளார். எச். வினோத் இயக்கத்தில் உருவாகும் இந்தப் படத்தில் லோகேஷின் கதாபாத்திரம் மிகவும் முக்கியமானது என்று கூறப்படுகிறது.
ரஜினி – கமல் படம் கைவிடப்பட்ட காரணம்
முன்னதாக ரஜினிகாந்த் மற்றும் கமல்ஹாசன் இருவரையும் வைத்து ஒரு படத்தை இயக்க லோகேஷ் திட்டமிட்டிருந்தார். ஆனால், இருவரும் ஒரு ‘லைட்-ஹார்டட்’ (Light-hearted) கதையை கேட்டதாகவும், தமக்கு ஆக்ஷன் பாணியைத் தவிர மற்றவற்றில் அனுபவம் குறைவு என்பதால் அந்தத் திட்டத்தில் இருந்து விலகியதாகவும் தற்போது நேர்மையாக விளக்கியுள்ளார்.
தற்போது லோகேஷ் கனகராஜ் தயாரிப்பில் ‘பென்ஸ்’ (Benz) மற்றும் ரத்னகுமார் இயக்கத்தில் ’29’ ஆகிய படங்கள் தயாரிப்பு நிலையில் உள்ளன. இதனால் அடுத்த இரண்டு ஆண்டுகள் லோகேஷின் திரைப்பயணத்தில் மிக முக்கியமானதாக இருக்கும் என்று சினிமா விமர்சகர்கள் கருதுகின்றனர்.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
