தமிழ் திரையுலகில் அழுத்தமான கதைக்களத்துடன் வெளியாகி விமர்சன ரீதியாகப் பாராட்டுக்களைப் பெற்ற திரைப்படங்கள் ஓடிடி தளங்களில் வெளியாகிவரும் நிலையில், தற்போது மேலும் ஒரு தரமான திரைப்படம் டிஜிட்டல் உலகிற்கு வரவுள்ளது. பிரபல எழுத்தாளர் சஜீவ் பாஜூர் இயக்கத்தில், நடிகர் கருணாஸ் (Karunas) மற்றும் நிமிஷா சஜன் (Nimisha Sajayan) நடிப்பில் உருவான சமூக மற்றும் சட்டப் போராட்டத் திரைப்படமான ‘என்ன விலை’ (Enna Vilai) வரும் அக்டோபர் 15-ஆம் தேதி பிரபல ஓடிடி தளமான நெட்ஃபிளிக்ஸ் (Netflix) தளத்தில் வெளியாகவுள்ளது.
ராமேசுவரம் கடற்கரைப் பின்னணியை மையமாகக் கொண்டு உருவாகியுள்ள இப்படத்தில், கடலில் காசுகளைத் தேடிச் சேகரிக்கும் ஒரு எளிய மீனவரான தவாசி, எதிர்பாராதவிதமாக ஒரு மதிப்புமிக்க தங்கப் பதக்கத்தைக் கண்டெடுக்கிறார். தான் கண்டெடுத்த அந்தப் பொருளை நேர்மையாக அதிகாரிகளிடம் ஒப்படைக்கும் அவர், அதனால் எழும் எதிர்பாராத சட்டச் சிக்கல்களிலும் பொய்யான குற்றச்சாட்டுகளிலும் சிக்குகிறார். ஒரு சாதாரண மனிதனின் நேர்மை அவனுக்கு எத்தகைய சோதனைகளைத் தருகிறது என்பதையும், அதிலிருந்து அவன் தனது குடும்பத்தைக் காப்பாற்ற நடத்தும் போராட்டத்தையும் இப்படம் மிக யதார்த்தமாகப் பேசுகிறது.
திரையரங்குகளில் வெளியானதைத் தொடர்ந்து, தற்போது தமிழ், இந்தி, தெலுங்கு, கன்னடம் மற்றும் மலையாளம் ஆகிய ஐந்து மொழிகளில் நெட்ஃபிளிக்ஸ் தளத்தில் இப்படம் வெளியாக உள்ளது. குறிப்பாக நெட்ஃபிளிக்ஸின் ‘சவுத்வெர்ஸ்’ (Southverse) பிரிவின் கீழ் இந்தத் திரைப்படம் தென்னிந்திய சினிமா ரசிகர்களைச் சென்றடையவுள்ளது. திரையரங்குகளில் தவறவிட்ட சினிமா ஆர்வலர்கள் இப்படத்தை ஓடிடியில் கண்டு ரசிக்க இது சிறந்த வாய்ப்பாக அமையும்.
கிரிஷ். இவர் டிஜிட்டல் செய்தி துறையில் துறையில் 5 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள செய்தி பிரிவில் பணியாற்றிய அனுபவம் கொண்டவர். சினிமா, விளையாட்டு சார்ந்த செய்திகள் வழங்குவதில் ஆர்வம் உள்ளவர்.
