‘லீலை’, ‘கொலைகாரன்’, ‘வதந்தி’ (சீசன் 1 மற்றும் 2) போன்ற வெற்றிப் படைப்புகளின் மூலம் தமிழ் திரையுலகில் கவனம் ஈர்த்த இயக்குநர் ஆண்ட்ரூ லூயிஸ் (Andrew Louis), சமீபத்திய பேட்டி ஒன்றில் விஜய் சேதுபதி நடிப்பில் உருவாகி வரும் ‘பாக்கெட் நாவல்’ (Pocket Novel) திரைப்படம் குறித்த சுவாரஸ்யமான தகவலைப் பகிர்ந்துள்ளார். அதாவது, ‘வதந்தி’ வெப் தொடர் பணிகளில் பிசியாகுவதற்கு முன்பு, தான் எழுதிய ‘பாக்கெட் நாவல்’ கதையைத் தானே இயக்கவிருந்ததாக அவர் குறிப்பிட்டுள்ளார்.
எனினும், எதிர்பாராதவிதமாக ‘வதந்தி’ தொடரின் பணிகளில் தான் மும்முரமாக இருக்க வேண்டிய சூழல் ஏற்பட்டதாகவும், இதற்கிடையில் அப்படத்தின் கதையைக் கேட்ட இயக்குநர் தியாகராஜன் குமாரராஜா (Thiagarajan Kumararaja) அதன் மீது ஈர்க்கப்பட்டு, தாமே இயக்க முன்வந்ததாகவும் அவர் தெரிவித்தார். இதன் காரணமாகவே அந்த அற்புதமான திட்டம் தியாகராஜன் குமாரராஜா இயக்கத்தில் உருவானதாகவும் ஆண்ட்ரூ லூயிஸ் கூறியுள்ளார். தற்போது இப்படத்திற்கு ஆண்ட்ரூ லூயிஸ் கதை மற்றும் திரைக்கதை எழுதியுள்ளது குறிப்பிடத்தக்கது.
