தமிழ் திரையுலகில் தற்போது வளர்ந்து வரும் திரைப்படங்களின் பெயர்களைப் பயன்படுத்தி அப்பாவி பொதுமக்களை ஏமாற்றும் மோசடிச் செயல்கள் அவ்வப்போது அரங்கேறி வருகின்றன. அந்த வகையில், சூப்பர் ஸ்டார் ரஜினிகாந்த் நடிப்பில் உருவாகவுள்ளதாகக் கூறப்படும் புதிய திரைப்படமான ‘தர்மன்’ (Dharman) படத்தில் நடிக்க வாய்ப்பு வாங்கித் தருவதாகக் கூறி சமூக வலைத்தளங்கள் மூலமாக விளம்பரம் செய்து மோசடியில் ஈடுபட்ட சம்பவம் கோலிவுட் வட்டாரத்தில் பெரும் அதிர்ச்சியை ஏற்படுத்தியுள்ளது. ‘ஆகாஷ் காஸ்ட்யூம்ஸ்’ (Akash Costumes) என்ற பெயரில் செயல்பட்ட நபரொருவர், இப்படத்தில் நடிக்க வருபவர்களுக்கு நடிகர் அடையாள அட்டைக்கு (Actor ID Card) முன்பணமாக ரூ.12,500 செலுத்த வேண்டும் என்றும், மாதந்தோறும் ரூ.18.50 லட்சம் வரை சம்பளம் கிடைக்கும் என்றும் கூறி பல இளைஞர்களிடம் மோசடியில் ஈடுபட்டுள்ளார்.
இது குறித்துப் பாதிக்கப்பட்ட தரப்பினர் அளித்த தகவலின் அடிப்படையில், உலகநாயகன் கமல்ஹாசனுக்குச் சொந்தமான ராஜ்கமல் ஃபிலிம் இன்டர்நேஷனல் (RKFI) நிறுவனத்தின் மேலாண்மை மற்றும் பாதுகாப்புப் பணிகளைக் கவனித்து வரும் உதவியாளர் முரளி, சென்னை காவல் ஆணையர் அலுவலகத்தில் நேரடியாகப் புகாரளித்துள்ளார். இந்தப் புகாரின் தீவிரத்தைக் கருத்தில் கொண்ட தேனாம்பேட்டை காவல்துறையினர் உடனடியாக வழக்குப் பதிவு செய்து தீவிர விசாரணையைத் தொடங்கியுள்ளனர். சினிமா வாய்ப்பு தேடும் இளம் தலைமுறையினரை குறிவைத்து இதுபோன்று போலியான முகவர் நிறுவனங்கள் செயல்படுவது அதிகரித்து வருவதைத் தடுக்கும் வகையில் காவல்துறை தீவிர நடவடிக்கைகளில் இறங்கியுள்ளது.
இந்தச் சம்பவம் கோலிவுட் வட்டாரத்தில் பெரும் பரபரப்பை ஏற்படுத்தியதைத் தொடர்ந்து, உஷாரடைந்த ராஜ்கமல் ஃபிலிம் இன்டர்நேஷனல் (RKFI) நிறுவனம், ஏற்கனவே கடந்த 8-ஆம் தேதி RKFI தரப்பில் அதிகாரப்பூர்வ அறிவிப்பு ஒன்று வெளியிடப்பட்டுள்ளது. அதில், தங்களது எந்தவொரு திரைப்படத்திற்கும் அல்லது தயாரிப்புப் பணிகளுக்கும் வெளியில் இருந்து எந்தவிதமான காஸ்டியூம் ஏஜெண்டுகளையோ அல்லது காஸ்டிங் ஏஜெண்டுகளையோ (Casting Agents) தாங்கள் அதிகாரப்பூர்வமாக நியமிக்கவில்லை என்றும், இது போன்ற போலியான நபர்களின் விளம்பரங்களை நம்பி யாரும் ஏமாற வேண்டாம் என்றும் பொதுமக்களுக்கு எச்சரிக்கை விடுக்கப்பட்டுள்ளது.
மேலும், திரைப்பட வாய்ப்புகள் குறித்த உண்மையான அறிவிப்புகள் தங்களது அதிகாரப்பூர்வ சமூக வலைத்தளப் பக்கங்கள் மூலமாக மட்டுமே வெளியிடப்படும் என்றும் அந்த அறிக்கையில் திட்டவட்டமாகத் தெரிவிக்கப்பட்டுள்ளது. சினிமா துறையில் நடக்கும் இது போன்ற போலி முகவர்களின் மோசடிகளுக்கு எதிராகத் திரைப்பட தயாரிப்பு நிறுவனங்களும் காவல்துறையும் இணைந்து கடுமையான எச்சரிக்கையை விடுத்து வருவது குறிப்பிடத்தக்கது.
