தமிழ் திரையுலகில் தனது அசாத்தியமான மற்றும் துடிப்பான நடன அசைவுகளின் மூலம் முன்னணி நட்சத்திரங்களை ஆட்டிப்படைத்து வரும் நடன இயக்குநர் சாண்டி மாஸ்டர் (Choreographer Sandy Master). லோகேஷ் கனகராஜ் இயக்கத்தில் வெளியான ‘லியோ’ படத்தில் நடிகராகவும் மிரட்டிய சாண்டி, தற்போது நேர்காணல் ஒன்றில் கோலிவுட்டின் உச்ச நட்சத்திரங்களான ரஜினிகாந்த், கமல்ஹாசன் மற்றும் தனுஷ் ஆகியோருடன் பாடல் கம்போசிங் செய்த போது நடந்த செம ஃபன்னான ரகசியங்களைப் பகிர்ந்துள்ளார்.
“சமீபத்தில் நடிகர் தனுஷ் (Dhanush) சாருடன் ஒரு பாடலுக்குப் பணியாற்றினோம்; அவரை முழுமையாக வெறித்தனமாக ஆட வைக்க வேண்டும் என்கிற எனது நீண்ட நாள் ஆசை அதில் நிறைவேறியது” எனச் சாண்டி மாஸ்டர் கூறியுள்ளார். எப்போதுமே தனுஷின் எனர்ஜிக்குத் தகுந்தவாறு ஸ்டெப்கள் வைப்பது பெரிய சவாலாக இருக்கும். இந்த லேட்டஸ்ட் பாடலில் தனுஷின் அசாத்திய நடனத் திறமையை ரசிகர்கள் முழுமையாகப் பார்ப்பார்கள் என்று அவர் நம்பிக்கை தெரிவித்துள்ளார்.
சூப்பர்ஸ்டார் ரஜினிகாந்துடன் (Rajinikanth) ‘கூலி’ (Coolie) படத்தின் ‘சிகிட்டு சிகிட்டு’ (Chikitu) பாடலில் பணியாற்றிய போது நடந்த ஒரு சுவாரசியமான நினைவையும் அவர் நினைவு கூர்ந்துள்ளார். “அந்தப் பாட்டில் வரும் ஒரு குறிப்பிட்ட கடினமான ஃப்ளோர் மூவ்மென்ட் (Floor Movement) ஸ்டெப்பை ரஜினி சார் செய்வாரா என்று எனக்குச் சிறிய சந்தேகம் இருந்தது. அதுகுறித்து கேட்க நான் சென்ற போது அவர் தூங்கிக் கொண்டிருந்தார். அவரை எழுப்பி ஸ்டெப்பை விளக்கியதும், உடனடியாக ‘ஆஹ்… என்ன பண்ணும்.. என்ன பண்ணும்..’ எனக் கேட்டு அசத்தலாக அந்த ஸ்டெப்பை ஆடி முடித்தார்” என்று ரஜினியின் அசாத்திய எனர்ஜியைப் பாராட்டியுள்ளார்.
கமல் சாருக்கு (Kamal Haasan) ‘சிங்காரி சரக்கு’ பாணி லோக்கல் டான்ஸ் வைக்க ஆசைப்பட்டேன்; ஆனால் ‘பத்தல பத்தல’ பாடலின் பாதி நடனம் எடிட்டிங்கில் கட் செய்யப்பட்டுவிட்டது” என்று ஒரு வருத்தத்தையும் பகிர்ந்துள்ளார். ‘விக்ரம்’ படத்தில் இடம்பெற்ற அந்தப் பாடலின் நீக்கப்பட்ட நடனப் பிரதிகள் (Deleted Version) இன்னும் பயங்கர மாஸாக இருக்கும் என்றும் சாண்டி குறிப்பிட்டுள்ளார். கோலிவுட்டின் இந்த மூன்று மாபெரும் உச்ச நட்சத்திரங்களின் நடன ரகசியங்களை சாண்டி மாஸ்டர் ஓப்பனாக உடைத்துள்ள இந்த சுவாரசிய நேர்காணல் தற்பொழுது இணையத்தில் ஒட்டுமொத்த சினிமா ரசிகர்கள் மத்தியிலும் பயங்கர வைரலாகி வருகிறது.
