தமிழ் சினிமாவின் டாப் இயக்குநர் ஏஆர் முருகதாஸ் மீது ‘மதரஸீ’ பட தயாரிப்பாளர் தரப்பிலிருந்து தயாரிப்பாளர் சங்கம் மற்றும் இயக்குநர் சங்கத்தில் அதிரடியாக ஒரு புகார் கிளம்பியுள்ளது. நடிகர் சிவகார்த்திகேயன் நடிப்பில் வெளியான இந்த மதரஸீ படத்தின் பட்ஜெட் விஷயத்தில் ஏற்பட்ட பெரிய குளறுபடி தான் இந்த பஞ்சாயத்துக்கு முக்கிய காரணமாகச் சொல்லப்படுகிறது. இந்த விவகாரம் இப்போது கோலிவுட் வட்டாரத்தில் ஒரு பெரிய பேச்சாக மாறியுள்ளது.
இந்த படத்தின் ஆரம்பக்கட்டத்தில் இயக்குநர் முருகதாஸ் சுமார் 115 கோடி ரூபாய் தான் பட்ஜெட் ஆகும் என்று கணக்கு சொல்லியிருக்கிறார். ஆனால் படம் ஷூட்டிங் முடிந்து ரிலீஸ் ஆகும் நேரத்தில் அந்த கணக்கு 170 கோடி ரூபாயைத் தாண்டி எகிறிவிட்டது. சுமார் 55 கோடி ரூபாய் எக்ஸ்ட்ரா ஆனதால் தயாரிப்பாளர் தரப்பு செம கடுப்பில் இருந்துள்ளது. முறையான பிளானிங் இல்லாதது தான் இந்த பட்ஜெட் சொதப்பலுக்குக் காரணம் என்று தயாரிப்பாளர் தரப்பில் சொல்லப்படுகிறது.
இன்னொரு பக்கம் முருகதாஸ் இந்த படத்தின் வேலைகள் நடந்து கொண்டிருக்கும் போதே ஹிந்தியில் சல்மான் கான் நடிக்கும் ‘சிக்கந்தர்’ பட வேலையிலும் பிஸியாக இருந்திருக்கிறார். இரண்டு படங்களையும் ஒரே நேரத்தில் கவனித்ததால் மதரஸீ படத்தின் பட்ஜெட் கண்ட்ரோல் இல்லாமல் போய்விட்டதாகத் தயாரிப்பாளர் தரப்பு குற்றம் சாட்டியுள்ளது. இதனால் ஏற்பட்ட நஷ்டத்தை ஈடுகட்ட முருகதாஸ் தரப்பிலிருந்து 10 கோடி ரூபாய் நஷ்ட ஈடு வேண்டும் என்று தயாரிப்பாளர் பிடிவாதம் பிடித்தார்.
இந்த விவகாரம் தயாரிப்பாளர் சங்கம் மற்றும் இயக்குநர் சங்கத்தின் மேசைக்குச் சென்றது. இரு சங்கங்களும் சேர்ந்து இயக்குநர் முருகதாஸ் உடன் இந்த விவகாரம் குறித்துப் பலமுறை பேச்சுவார்த்தை நடத்தினார்கள். பல கட்ட பேச்சுவார்த்தைக்குப் பிறகு ஒரு வழியாக ஒரு முடிவுக்கு வந்துள்ளனர். அதன்படி தனது முந்தைய பிளாக்பஸ்டர் படமான ‘ரமணா’ படத்தின் இரண்டாம் பாகத்தின் கதையை (தெலுங்கு வெர்ஷன்) அதே தயாரிப்பு நிறுவனத்திற்கு முருகதாஸ் இலவசமாக எழுதிக் கொடுக்க ஒப்புக்கொண்டுள்ளார்.
முருகதாஸ் தரப்பில் 10 கோடி ரூபாய் பணமாகக் கொடுக்க முடியாத சூழலில் இந்த கதை எழுதிக்கொடுக்கும் டீல் ஒரு பெரிய விஷயமாகப் பார்க்கப்படுகிறது. ரமணா போன்ற ஒரு பெரிய ஹிட் படத்தின் இரண்டாம் பாகம் என்பதால் இதன் மூலம் வரும் லாபத்தை வைத்து மதரஸீ படத்தில் ஏற்பட்ட நஷ்டத்தை ஈடுகட்டிக்கொள்ளலாம் என்று தயாரிப்பாளர் தரப்பும் இதற்கு ஓகே சொல்லிவிட்டது. இதனால் தற்போது இந்தப் பஞ்சாயத்து ஒரு முடிவுக்கு வந்துள்ளது.
சினிமாவில் ஒரு இயக்குநர் ஒரே நேரத்தில் இரண்டு படங்களில் கவனம் செலுத்தும்போது இதுபோன்ற பட்ஜெட் பிரச்னைகள் வருவது புதிதல்ல என்றாலும் முருகதாஸ் போன்ற ஒரு சீனியர் இயக்குநர் மீது இப்படி ஒரு புகார் வந்தது பலருக்கும் ஆச்சரியத்தை ஏற்படுத்தியுள்ளது. எது எப்படியோ ரமணா 2 படத்தின் கதை மூலம் இந்த விவகாரம் இப்போது ஸ்மூத் ஆகிவிட்டது.
கிரிஷ். இவர் டிஜிட்டல் செய்தி துறையில் துறையில் 5 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள செய்தி பிரிவில் பணியாற்றிய அனுபவம் கொண்டவர். சினிமா, விளையாட்டு சார்ந்த செய்திகள் வழங்குவதில் ஆர்வம் உள்ளவர்.
