இந்தியத் திரையுலகமே வியந்து பார்க்கும் வகையில் பிரம்மாண்டமான படைப்புகளைத் தருவதில் வல்லவர் இயக்குநர் அட்லீ. ‘ஜவான்’ படத்தின் மாபெரும் வெற்றிக்குப் பிறகு, அவர் தற்போது ஐகான் ஸ்டார் அல்லு அர்ஜுனுடன் இணைந்துள்ள திரைப்படம் ‘ராகா’ (Raaka). சுமார் ₹800 கோடி பட்ஜெட்டில் உருவாகும் இந்தப் படம், தற்போது நடிகர்களின் சம்பள விவகாரத்தால் சமூக வலைதளங்களில் ஹாட் டாபிக்காக மாறியுள்ளது.
சமீபத்திய அறிக்கைகளின்படி, இந்தப் படத்தில் நடிக்க அல்லு அர்ஜுனுக்கு ₹175 கோடி சம்பளம் பேசப்பட்டுள்ளதாகத் தெரிகிறது. இது படத்தில் நடிக்கும் மற்ற முன்னணி நட்சத்திரங்களான தீபிகா படுகோன் மற்றும் ராஷ்மிகா மந்தனாவின் சம்பளத்தை விட பல மடங்கு அதிகம். பாலிவுட் டாப் நடிகையான தீபிகா படுகோனுக்கு ₹25 கோடியும், ராஷ்மிகா மந்தனாவிற்கு ₹5 முதல் ₹7 கோடியும் சம்பளமாக வழங்கப்படுவதாகக் கூறப்படுகிறது.
அதாவது, தீபிகாவை விட சுமார் 7 மடங்கும், ராஷ்மிகாவை விட பல மடங்கும் அதிகமான ஊதியத்தை அல்லு அர்ஜுன் பெறுகிறார்.
இந்த இமாலய சம்பள உயர்வு குறித்துத் திரையுலகினர் கூறுகையில், அல்லு அர்ஜுனின் ‘புஷ்பா 2’ படத்திற்குப் பிறகு அவருக்குக் கிடைத்துள்ள உலகளாவிய வரவேற்பும், அட்லீயின் மேக்கிங் ஸ்டைலும் இந்தப் படத்தின் வசூல் வாய்ப்பை பலமடங்கு அதிகரித்துள்ளதாகத் தெரிவிக்கின்றனர். குறிப்பாக, இந்தப் படத்தில் அல்லு அர்ஜுன் மூன்று வேடங்களில் (Tripe Role) நடிக்கிறார். ஒரு நேர்மையான போலீஸ் அதிகாரி, பாதி மனிதன் – பாதி மிருகம் போன்ற ஒரு விசித்திரக் கதாபாத்திரம் மற்றும் அவர்களின் தந்தை என மூன்று மாறுபட்ட பரிமாணங்களில் அவர் தோன்றவுள்ளார்.
‘ராகா’ படத்தின் ஃபர்ஸ்ட் லுக் போஸ்டர் அல்லு அர்ஜுனின் பிறந்தநாளை முன்னிட்டு வெளியாகி வைரலானது. அந்தப் போஸ்டரில் முகத்தில் முடிகளுடன், கொம்புகள் போன்ற அமைப்போடு அவர் காட்சியளித்தது ரசிகர்களை மிரள வைத்தது. இந்தப் போஸ்டரைப் பார்த்த பாலிவுட் பாட்ஷா ஷாருக்கான், “இது மிகவும் சுவாரஸ்யமாகவும் அற்புதமாகவும் இருக்கிறது” எனப் பாராட்டியது படத்திற்கான எதிர்பார்ப்பை இரட்டிப்பாக்கியுள்ளது.
சன் பிக்சர்ஸ் தயாரிக்கும் இந்தப் படத்தில் ஜான்வி கபூர் மற்றும் மிருணால் தாக்கூர் ஆகியோரும் முக்கிய வேடங்களில் நடிக்கவுள்ளதாகத் தகவல்கள் கசிகின்றன.
தற்போது இந்தப் படத்தின் படப்பிடிப்பு விறுவிறுப்பாக நடைபெற்று வருகிறது. அடுத்தக்கட்டப் படப்பிடிப்பு மும்பையில் தொடங்கவுள்ளது. 2026-ம் ஆண்டின் மிகப்பெரிய வெளியீடாக இந்தப் படம் இருக்கும் என எதிர்பார்க்கப்படுகிறது. ராஷ்மிகா மந்தனாவுக்குத் தென்னிந்தியா மற்றும் வட இந்தியாவில் இருக்கும் செல்வாக்கு காரணமாக, மற்ற நாயகிகளை விட அவருக்கு அதிக சம்பளம் வழங்கப்படுவதாகவும் சினிமா வட்டாரங்கள் தெரிவிக்கின்றன.
அட்லீயின் முந்தைய படங்களைப் போலவே ‘ராகா’ படமும் விஷுவல் ரீதியாகவும், ஆக்ஷன் காட்சிகளிலும் ஒரு புதிய அனுபவத்தைத் தரும் என நம்பப்படுகிறது. ₹175 கோடி சம்பளம் என்பது ஒரு தென்னிந்திய நடிகருக்கு வழங்கப்படுவது இதுவே முதல்முறை எனக் கூறப்படுவதால், அல்லு அர்ஜுனின் மார்க்கெட் தற்போது உச்சத்தில் இருப்பது உறுதியாகியுள்ளது.
