தமிழ் சினிமாவில் ‘ராஜா ராணி’ படத்தின் மூலம் இயக்குனராக அறிமுகமாகி, இன்று பாலிவுட் வரை கொடி கட்டிப் பறப்பவர் இயக்குனர் அட்லீ. இவரது மனைவி பிரியா அட்லீயும் ஒரு தயாரிப்பாளராகவும், நடிகையாகவும், அறியப்படுபவர். கடந்த 2014-ம் ஆண்டு காதலித்து திருமணம் செய்து கொண்ட இந்த தம்பதிக்கு, கடந்த 2023-ம் ஆண்டு ‘மீர்’ என்ற மகன் பிறந்தார். இந்நிலையில், தற்போது அட்லீ மற்றும் பிரியா தம்பதியினர் தங்களது இரண்டாவது குழந்தையை வரவேற்றுள்ளனர்.
இன்று ஏப்ரல் 20, 2026 அன்று அட்லீ – பிரியா தம்பதிக்கு அழகான பெண் குழந்தை பிறந்துள்ளது. இந்த மகிழ்ச்சியான செய்தியை அட்லீ தனது சமூக வலைதள பக்கத்தில் மிகவும் க்யூட்டான ஒரு போஸ்டர் மூலம் பகிர்ந்துள்ளார். அதில் அவர்களது மகன் மீர், “எனக்கு ஒரு குட்டித் தங்கை கிடைத்துவிட்டது. நான் இப்போது அண்ணன் ஆகிவிட்டேன்” என்று சொல்வது போன்ற வாசகங்கள் இடம்பெற்றுள்ளன. இந்த போஸ்டர் தற்போது இணையத்தில் செம வைரலாகி வருகிறது.
“தேவதை வந்துவிட்டாள்” என்று அட்லீ பதிவிட்டுள்ள இந்த செய்தியை கேட்டு ரசிகர்கள் மற்றும் சினிமா பிரபலங்கள் வாழ்த்து மழையை பொழிந்து வருகின்றனர். குறிப்பாக நடிகைகள் சமந்தா, ராஷ்மிகா மந்தனா மற்றும் தீபிகா படுகோன் ஆகியோர் இந்த தம்பதிக்கு தங்களது மனமார்ந்த வாழ்த்துகளை தெரிவித்துள்ளனர். அக்ஷய திருதியை முடிந்து அடுத்த நாளே அட்லீ வீட்டில் லட்சுமி கடாட்சமாக பெண் குழந்தை பிறந்துள்ளதை அவரது குடும்பத்தினர் கொண்டாடி வருகின்றனர்.
Feeling blessed 💞💞💞💞💞@priyaatlee pic.twitter.com/tQgPKbQZbi
— atlee (@Atlee_dir) April 20, 2026
இயக்குனர் அட்லீ தற்போது அல்லு அர்ஜுன் மற்றும் தீபிகா படுகோன் நடிக்கும் ‘ராக்கா’ (Raaka) படத்தின் பணிகளில் பிசியாக இருக்கிறார். ‘ஜவான்’ படத்தின் மாபெரும் வெற்றிக்கு பிறகு அட்லீ இயக்கும் இந்த படத்தின் மீதான எதிர்பார்ப்பு இந்திய அளவில் அதிகரித்துள்ளது. ஒரு பக்கம் சினிமா வாழ்க்கை, மறுபக்கம் குடும்ப வாழ்க்கை என இரண்டிலும் அட்லீ தற்போது உச்சத்தில் இருக்கிறார். இரண்டு குழந்தைகள் மற்றும் வளர்ப்பு நாய்களுடன் தங்களது குடும்பம் தற்போது ஒரு முழுமையான அழகான கூட்டாக மாறிவிட்டதாக பிரியா அட்லீ நெகிழ்ச்சியுடன் தெரிவித்துள்ளார்.
