‘ஜமா’ திரைப்படத்தின் வெற்றிக்குப் பிறகு, இயக்குநர் பாரி இளவழகன் இயக்கி, கதாநாயகனாக நடித்துள்ள திரைப்படம் ‘அன்பே டயானா’. இப்படம் ஜூலை 17, 2026 அன்று உலகம் முழுவதும் திரையரங்குகளில் வெளியாகிறது. இப்படத்தின் வெளியீட்டிற்கு முன்னதாக, தனது எதிர்காலத் திட்டங்கள் குறித்து அவர் சுவாரஸ்யமான தகவல்களைப் பகிர்ந்துள்ளார்.
‘அன்பே டயானா’ படத்தைத் தொடர்ந்து, மற்றொரு இயக்குநரின் படத்தில் பாரி இளவழகன் நடிகராக நடிக்கவுள்ளார். அந்தப் படம் இந்த ஆண்டிற்குள்ளேயே வெளியாக வாய்ப்புள்ளதாகத் தெரிகிறது. அதே நேரத்தில், தனது அடுத்த இயக்கத்திற்கான கதை எழுதும் பணியிலும் அவர் தீவிரமாக ஈடுபட்டுள்ளார். திருவண்ணாமலையை மையமாகக் கொண்ட அந்தப் படம், அவருக்கு மிகவும் நெருக்கமான கதையாக இருக்கும் என்று அவர் குறிப்பிட்டுள்ளார்.
இதனைத் தொடர்ந்து, தயாரிப்பாளராகவும் களமிறங்கும் திட்டத்தில் இருக்கும் பாரி இளவழகன், அதற்கான ஆரம்பகட்டப் பணிகளைத் தொடங்கியுள்ளார். தனது சினிமா பயணத்தில் பன்முகத்தன்மையுடன் செயல்பட விரும்பும் அவர், மக்கள் சந்திக்கும் எதார்த்தமான வாழ்வியலைத் திரையில் கொண்டு வருவதையே நோக்கமாகக் கொண்டுள்ளார்.
