திரையுலகில் எப்போதும் வித்தியாசமான முயற்சிகளை மேற்கொண்டு வரும் நடிகர் மற்றும் இயக்குநர் பார்த்திபன், தற்போது தனது தனிப்பட்ட வாழ்விலும் ஒரு புரட்சிகரமான மாற்றத்தைச் செய்துள்ளார். நீண்ட சட்டப் போராட்டத்திற்குப் பிறகு, அவர் அதிகாரப்பூர்வமாக ‘ஜாதி மற்றும் மதமற்றவர்’ (No Caste, No Religion) என்ற சான்றிதழைப் பெற்றுள்ளார்.
கடந்த சில மாதங்களுக்கு முன்பு, தனக்கு ஜாதி மற்றும் மதமற்றவர் என்ற சான்றிதழ் வழங்கக் கோரி சென்னை உயர்நீதிமன்றத்தில் பார்த்திபன் வழக்குத் தொடர்ந்திருந்தார். இந்த வழக்கை விசாரித்த நீதிமன்றம், மனுதாரரின் விருப்பத்தின் அடிப்படையில் அவருக்கு உரிய சான்றிதழை வழங்குமாறு வருவாய்த் துறைக்கு உத்தரவிட்டது.
நீதிமன்றத்தின் இந்த உத்தரவின் அடிப்படையில், சென்னை சோழிங்கநல்லூர் வட்டாட்சியர் (Tahsildar), நடிகர் பார்த்திபனுக்கு ‘ஜாதி, மதமற்றவர்’ என்ற சான்றிதழை வழங்கியுள்ளார். இதன் மூலம் ஜாதி மற்றும் மத அடையாளங்கள் அற்ற ஒரு குடிமகனாக அவர் முறைப்படி அங்கீகரிக்கப்பட்டுள்ளார்.
பார்த்திபன் தாக்கல் செய்த இந்த வழக்கு இன்று (ஏப்ரல் 29, 2026) மீண்டும் விசாரணைக்கு வர உள்ளது. அப்போது, வட்டாட்சியர் மூலம் சான்றிதழ் வழங்கப்பட்ட தகவல் நீதிமன்றத்தில் அதிகாரப்பூர்வமாகத் தெரிவிக்கப்படும் என்று எதிர்பார்க்கப்படுகிறது. ஏற்கனவே தமிழகத்தில் ஒரு சில நபர்கள் இது போன்ற சான்றிதழ்களைப் பெற்றுள்ள நிலையில், ஒரு பிரபல நடிகர் முன்வந்து இத்தகைய சான்றிதழைப் பெற்றுள்ளது பொதுமக்களிடையே பெரும் வரவேற்பைப் பெற்றுள்ளது.
சமூக வலைதளங்களில் இந்தப் புகைப்படம் மற்றும் செய்தி வைரலாகி வரும் நிலையில், “ஜாதி மற்றும் மதங்களைக் கடந்த மனிதநேயமே முக்கியம்” என்று பார்த்திபன் அடிக்கடி கூறி வரும் கருத்திற்கு இது ஒரு வலுவான சான்றாக அமைந்துள்ளது.
