நடிகர் லெஜண்ட் சரவணன் நடிப்பில் வரும் ஏப்ரல் 3-ஆம் தேதி திரைக்கு வரவுள்ள ‘லீடர்’ (Leader) திரைப்படம் தமிழ் சினிமாவில் ஒரு புதிய சாதனையைப் படைக்கும் என எதிர்பார்க்கப்படுகிறது. அண்மையில் நடந்த படத்தின் ப்ரோமோஷன் நிகழ்ச்சியில் பேசிய லெஜண்ட் சரவணன், இந்தப் படத்தின் வெற்றி குறித்து மிகவும் அதிரடியான மற்றும் நம்பிக்கையான சில கருத்துக்களைப் பகிர்ந்துள்ளார். குறிப்பாக தமிழ் சினிமாவின் பிரம்மாண்ட வெற்றிகளான ரஜினியின் ‘ஜெயிலர்’, கமலின் ‘விக்ரம்’ மற்றும் விஜய்யின் ‘லியோ’ ஆகிய படங்களுடன் தனது ‘லீடர்’ படத்தை அவர் ஒப்பிட்டுப் பேசியிருப்பது இணையத்தில் வைரலாகி வருகிறது.
மேடையில் பேசிய சரவணன், “லீடர் படத்தின் மீது எனக்கு மிகப்பெரிய நம்பிக்கை இருக்கிறது. இந்தப் படத்தின் வெற்றி நிச்சயம் ஜெயிலர், விக்ரம் மற்றும் லியோ போன்ற மாபெரும் வெற்றிகளுக்கு இணையாக இருக்கும். ஒரு கமர்சியல் ஹிட் படத்திற்குத் தேவையான அனைத்து அம்சங்களும் இந்த லீடர் படத்தில் மிகச் சரியாக அமைந்திருக்கின்றன. ஆக்சன், செண்டிமெண்ட், காமெடி என ஒரு பக்கா பேக்கேஜாக இந்தப் படத்தை இயக்குநர் துரை செந்தில்குமார் செதுக்கியுள்ளார்” என்று மிகுந்த உற்சாகத்துடன் தெரிவித்தார்.
தொடர்ந்து பேசிய அவர், “இந்தப் படத்தை நீங்கள் தாராளமாகக் குடும்பத்துடன் வந்து பார்க்கலாம். 100 சதவீதம் இந்தப் படம் உங்கள் அனைவரையும் திருப்திப்படுத்தும். ஒரு முழுமையான ஃபேமிலி என்டர்டெய்னர் படமாக இது இருக்கும் என்பதில் எனக்கு எவ்வித சந்தேகமும் இல்லை. 2026-ஆம் ஆண்டின் மிகப்பெரிய பிளாக்பஸ்டர் படங்களின் பட்டியலில் ‘லீடர்’ நிச்சயம் இடம்பெறும் என்று நான் உறுதியாக நம்புகிறேன்” என்று தனது பாணியில் தெறிக்கவிட்டுள்ளார்.
இயக்குநர் ஆர்.எஸ். துரை செந்தில்குமார் ஏற்கனவே ‘எதிர் நீச்சல்’ முதல் ‘கருடன்’ வரை பல ஹிட் படங்களைக் கொடுத்தவர் என்பதால், லெஜண்ட் சரவணனின் இந்த அதிரடி பேச்சுக்கு ஒரு வலுவான காரணம் இருப்பதாகவே சினிமா விமர்சகர்கள் கருதுகின்றனர். படத்தின் ட்ரெய்லர் மற்றும் பாடல்கள் ஏற்கனவே இளைஞர்கள் மத்தியில் நல்ல வரவேற்பைப் பெற்றுள்ள நிலையில், தற்போது குடும்ப ஆடியன்ஸையும் கவரும் வகையில் சரவணன் பேசியிருப்பது படத்தின் முன்பதிவுக்குப் பெரிய அளவில் உதவும் என்று எதிர்பார்க்கப்படுகிறது.
ஜிப்ரான் இசையில் வெளியாகியுள்ள பாடல்கள் மற்றும் பின்னணி இசை படத்தின் ஆக்சன் காட்சிகளுக்குப் பெரிய பலமாக இருக்கும் என்று சொல்லப்படுகிறது. குறிப்பாக ரயிலில் எடுக்கப்பட்ட கிளைமாக்ஸ் சண்டைக் காட்சி ரசிகர்களுக்கு ஒரு பெரிய ட்ரீட்டாக இருக்கும். ஜெயிலர் மற்றும் விக்ரம் போன்ற படங்கள் எப்படி அனைத்துத் தரப்பு மக்களையும் கவர்ந்து வசூல் சாதனை படைத்ததோ, அதே மேஜிக் ‘லீடர்’ படத்திலும் நிகழும் என ஒட்டுமொத்தப் படக்குழுவும் வெயிட்டிங்கில் உள்ளது. வரும் ஏப்ரல் 3-ஆம் தேதி லெஜண்ட் சொன்னது போல இந்த ‘லீடர்’ சம்பவம் செய்யப்போகிறாரா என்பதைப் பொறுத்திருந்து பார்ப்போம்.
