‘மிஸ்டர் அண்ட் மிஸஸ் பேச்சுலர்’ (Mr & Mrs Bachelor) பட விளம்பர பணிகளில் நடிகை அனஸ்வரா ராஜன் ஒத்துழைக்கவில்லை என்று இயக்குனர் தீபு கருணாகரன் சுமத்திய குற்றச்சாட்டுகள், மலையாள மற்றும் தமிழ் திரையுலகில் பெரும் விவாதத்தை ஏற்படுத்தியுள்ளது. அனஸ்வரா படத்தின் புரோமோஷன்களில் பங்கேற்காமல் தட்டிக்கழிப்பதாகவும், பண விஷயத்தில் கறார் காட்டியதால் படப்பிடிப்பு பாதித்ததாகவும் இயக்குனர் பகிரங்கமாக குற்றம் சாட்டினார். இளம் நடிகையின் தொழில்முறை நேர்மை குறித்து கேள்வி எழுப்பப்பட்ட நிலையில், இதற்கு அனஸ்வரா தனது சமூக வலைதள பக்கத்தில் விரிவான விளக்கத்தையும் வலுவான பதிலடியையும் வழங்கியுள்ளார்.
இயக்குனரின் குற்றச்சாட்டுகளை முழுமையாக மறுத்த அனஸ்வரா, படத்தின் போஸ்டர்கள் மற்றும் டீசரை முறையாகப் பகிர்ந்துள்ளதாக ஆதாரங்களுடன் தெரிவித்துள்ளார். “பணத்தை எண்ணிப் பார்த்த பின்னரே படப்பிடிப்புக்கு வந்தார்” என்ற இயக்குனரின் கருத்து தன்னை மனரீதியாகப் பாதித்துள்ளதாகக் குறிப்பிட்ட அவர், உண்மையில் தயாரிப்பு தரப்பில் நிதி நெருக்கடி ஏற்பட்டபோது, இயக்குனரே தன்னை அறையை விட்டு வர வேண்டாம் என்று கூறியதாகவும், ஆனால் தான் படத்தின் நலன் கருதி முன்வந்து நடித்துக் கொடுத்ததாகவும் கூறியுள்ளார்.
மேலும், படத்தின் வெளியீட்டு தேதி குறித்து தனக்கு எந்த தகவலும் தெரிவிக்கப்படவில்லை என்றும், அப்படி இருக்கையில் எப்படி விளம்பரங்களில் பங்கேற்க முடியும் என்றும் அவர் கேள்வி எழுப்பியுள்ளார். இயக்குனர் தனது தாய் மற்றும் மேலாளர் குறித்துத் தனிப்பட்ட முறையில் விமர்சித்தது வருத்தமளிப்பதாகக் கூறிய அனஸ்வரா, ஒரு இளம் பெண் கலைஞர் என்பதால் தான் அமைதியாக இருப்பேன் என்று கருத வேண்டாம் எனவும் எச்சரித்துள்ளார். இந்த விவகாரத்தில் தனது நற்பெயருக்குக் களங்கம் விளைவிப்பவர்கள் மீது சட்டப்பூர்வ நடவடிக்கை எடுக்கப்போவதாகவும், இது தொடர்பாக ‘அம்மா’ (AMMA) சங்கத்தில் புகார் அளித்துள்ளதாகவும் அவர் தெரிவித்துள்ளார்.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
