மதுரையில் பெண்கள் தங்கும் விடுதியில் தீ விபத்து ஏற்பட்ட நிலையில் அந்த கட்டிடத்தை இடிக்க முடிவு செய்யப்பட்டுள்ளது.
மதுரை மாவட்டம், கட்ராபாளையம் பகுதியில் இயங்கி வரும் பெண்கள் விடுதியில் இன்று காலை ஏற்பட்ட தீ விபத்தில் மூன்று திணறல் ஏற்பட்டு ஆசிரியை உட்பட இரண்டு பேர் பலியாகின சம்பவம் பெரும் அதிர்ச்சியை ஏற்படுத்தியிருந்தது. விபத்து நடந்த இடத்தை கலெக்டர் சங்கீதா ஆய்வு செய்தார்.
அப்போது அவர் கூறுகையில் மதுரை மீனாட்சி அம்மன் கோவிலை சுற்றியுள்ள பழமை வாய்ந்த கட்டிடங்களை இடிப்பதற்கு மாநகராட்சி சார்பில் இருந்து முறையாக நோட்டீஸ் வழங்கியும் அவர்கள் இடிக்காமல் இருக்கிறார்கள். நீதிமன்றத்தை சிலர் அணுகி இருக்கிறார்கள். இடிக்காமல் இருக்கும் பழமை வாய்ந்த கட்டிடங்கள் ஆலோசிக்கப்பட்டு சீல் வைக்கப்படும் என்று கூறியிருந்தார்.
மேலும் மாநகராட்சி ஆணையர் தினேஷ் குமாரும் பார்வையிட்டு முறையான மாநகராட்சி அனுமதி, சுகாதாரத்துறை அனுமதி, தீயணைப்பு துறையின் தடையிலா சான்று, காவல்துறையின் அனுமதி என எந்த விதமான அனுமதியும் பெறாமல் இந்த விடுதி செயல்பட்டு வந்திருக்கின்றது என்று தெரிவித்திருந்தார். இந்நிலையில் தீ விபத்து ஏற்பட்டு இரண்டு பெண்கள் பலியானதால் இந்த பெண்கள் தங்கும் விடுதியை இடிக்க முடிவு செய்யப்பட்டிருக்கின்றது. விடுதி செயல்பட்டு வந்த கட்டிட உரிமையாளருக்கு மீண்டும் ஒரு நோட்டீஸ் வழங்க இருப்பதாகவும் மதுரை மாநகராட்சி சார்பில் தெரிவிக்கப்பட்டிருக்கின்றது.
