வி.ஜே. பப்பு மற்றும் அனுபமா நடிப்பில் உருவான மை டியர் டாலி ரிலீஸ் (My Dear Dolly Release) குறித்த அதிகாரப்பூர்வ அறிவிப்பை படக்குழுவினர் வெளியிட்டுள்ளனர்.
ஏ. அரவிந்த் ராஜ் இயக்கத்தில் ரொமான்டிக் காமெடி பாணியில் உருவாகியுள்ள இத்திரைப்படம் பிப்ரவரி 20-ஆம் தேதி திரையரங்குகளில் வெளியாகிறது. பொங்கல் விடுமுறைக்கு பிந்தைய முக்கியமான வெளியீடாக இது பார்க்கப்படும் நிலையில், தற்பொழுது படத்திற்கான விளம்பரப் பணிகள் முழுவீச்சில் நடைபெற்று வருகின்றன.
சிம்மமூர்த்தி சினிமாஸ் சார்பில் ஆர்.எம். ஜெயராம சந்திரவன் தயாரித்துள்ள இப்படத்தில், ஒரே அலுவலகத்தில் பணிபுரியும் ஒரு ஆணுக்கும் பெண்ணுக்கும் இடையிலான சுவாரஸ்யமான காதல் மற்றும் திருமணச் சூழலில் ஏற்படும் சிக்கல்களை இயக்குநர் நகைச்சுவையுடன் கையாண்டுள்ளார். கதாநாயகன் மற்றும் கதாநாயகி வெவ்வேறு இடங்களுக்கு மாறிய பிறகு மீண்டும் ஒரு திருமண நிகழ்வில் சந்திப்பதும், அதன் பிறகு அவர்களுக்குள் ஏற்படும் திருப்பங்களுமே இப்படத்தின் கதைக்களம் என இயக்குநர் அரவிந்த் ராஜ் தெரிவித்துள்ளார்.
வி.ஜே. பப்புவிற்கு இது ஒரு முக்கியமான திருப்புமுனைத் திரைப்படமாக அமையும் என எதிர்பார்க்கப்படுகிறது. இப்படத்திற்கு பாசில் இசையமைக்க, பாலாஜி சேகர் ஒளிப்பதிவு செய்துள்ளார். சென்னை மற்றும் அதனைச் சுற்றியுள்ள பகுதிகளில் இதன் படப்பிடிப்பு முழுமையாக நிறைவடைந்துள்ள நிலையில், பிப்ரவரி 20-ஆம் தேதிக்கான திரையரங்கு முன்பதிவுகள் விரைவில் தொடங்கும் எனத் தெரிகிறது. நிஜ வாழ்க்கைச் சம்பவங்களை மையமாகக் கொண்ட இக்கதை அனைத்துத் தரப்பு ரசிகர்களையும் கவரும் என படக்குழுவினர் நம்பிக்கை தெரிவித்துள்ளனர்.
