தமிழ் சினிமாவில் தற்போது கவனிக்கப்படும் பெயர்களில் ஒருவராக உள்ளார் ரவி மோகன் (Ravi Mohan). சமீபத்தில் வெளியான ‘பராசக்தி’ (Parasakthi) திரைப்படத்தில் சிவகார்த்திகேயனுக்கு எதிராக அவர் வெளிப்படுத்திய வில்லன் நடிப்பு பாராட்டைப் பெற்றது. அந்த நிலையில், தற்போது தனது சொந்தத் தயாரிப்பு நிறுவனமான ‘ரவி மோகன் ஸ்டுடியோஸ்’ (Ravi Mohan Studios) மூலம் இயக்குநராகவும் புதிய கட்டத்தைத் தொடங்கியுள்ளார். அவர் இயக்கும் முதல் திரைப்படமான ‘An Ordinary Man’ (ஒரு சாதாரண மனிதன்) படத்தின் படப்பிடிப்பு முறையான பூஜையுடன் தொடங்கியது.
View this post on Instagram
இப்படத்தில் யோகி பாபு (Yogi Babu) கதாநாயகனாக நடிக்கிறார். இந்தப் படத்தின் பின்னணியில் ஒரு சம்பவம் குறிப்பிடத்தக்கது. 2019-ல் ‘கோமாளி’ (Comali) படத்தில் பணியாற்றியபோது, யோகி பாபுவிடம் “உங்களை வைத்து ஒரு படம் இயக்குவேன்” என்று ரவி மோகன் வாக்குறுதி அளித்துள்ளார். பொதுவாக சினிமாவில் இதுபோன்ற வாக்குறுதிகள் நிறைவேறாமல் போகும் சூழலும் உள்ளது. ஆனால், 6 ஆண்டுகள் கடந்த பிறகும் தனது சொல்லைக் காப்பாற்றி, யோகி பாபுவை நாயகனாக வைத்து தனது முதல் படத்தை ரவி மோகன் தொடங்கியிருப்பது கவனம் ஈர்த்துள்ளது.
நடைபெற்ற படப்பூஜையில் ரவி மோகன், யோகி பாபு ஆகியோருடன் ரவி மோகனின் தோழியும் பாடகியுமான கெனிஷா பிரான்சிஸ் (Kenishaa Francis) கலந்து கொண்டார். சமூக வலைத்தளங்களில் படக்குழுவினர் பகிர்ந்துள்ள புகைப்படங்களில் கெனிஷா டேக் செய்யப்பட்டுள்ளதால், அவர் இப்படத்தில் பாடகியாகவோ அல்லது வேறு ஒரு பொறுப்பிலோ இணைந்து பணியாற்றுவார் என எதிர்பார்க்கப்படுகிறது. ரவி மோகன் ஸ்டுடியோஸின் இரண்டாவது தயாரிப்பான இது, ஏற்கனவே தயாரிப்பில் உள்ள ‘புரோ கோட்’ (Bro Code) படத்திற்குப் பிறகு தொடங்கப்பட்டுள்ளது.
‘An Ordinary Man’ ஒரு எதார்த்தமான, அதேசமயம் திருப்பங்கள் கொண்ட கதையாக இருக்கும் எனத் தெரிவிக்கப்படுகிறது. ரவி மோகன் இப்படத்தில் நடிப்பாரா என்பது இன்னும் உறுதி செய்யப்படவில்லை. ‘ஜெனி’ (Genie), ‘புரோ கோட்’, ‘கராத்தே பாபு’ என ரவி மோகனின் கைவசம் பல படங்கள் இருந்தாலும், இயக்குநராக அவர் தொடங்கும் இந்தப் படம் அவரது திரைப் பயணத்தில் ஒரு முக்கிய கட்டமாக அமைய வாய்ப்புள்ளது.
