கும்பமேளா நிகழ்வின் போது எடுக்கப்பட்ட ஒரு வீடியோ மூலம் சமூக வலைதளங்களில் இந்தியா முழுவதும் வைரல் அழகியாக அறியப்பட்ட மோனாலிசா போஸ்லே (Monalisa Bhosle), தனது நீண்ட நாள் காதலரான நடிகர் ஃபர்மான் கானை (Farman Khan) திருமணம் செய்து கொண்டார். இவர்களின் திருமணம் மார்ச் 11, 2026 அன்று கேரள மாநிலம் திருவனந்தபுரம் அருகே உள்ள விழிஞ்ஞம் அருமானூர் நாயினார் தேவர் கோவிலில் வைத்து மிகவும் எளிமையான முறையில் நடைபெற்றது. மராட்டிய மாநிலத்தைச் சேர்ந்த ஃபர்மான் கான் ஒரு நடிகராகவும், மாடலாகவும் பணியாற்றி வருவது குறிப்பிடத்தக்கது.
இந்தத் திருமணத்தின் பின்னணியில் ஒரு மிகப்பெரிய போராட்டமே நடந்துள்ளது. மோனாலிசா மற்றும் ஃபர்மான் கான் ஆகிய இருவரும் வெவ்வேறு மதங்களைச் சேர்ந்தவர்கள் என்பதால், இவர்களின் காதலுக்கு மோனாலிசாவின் குடும்பத்தினர் தரப்பில் கடும் எதிர்ப்பு கிளம்பியது. குறிப்பாக மோனாலிசாவின் தந்தை ஜெய் சிங் போஸ்லே, தனது மகளை அவரது சொந்த ஊரான இந்தூருக்கே அழைத்துச் சென்று ஒரு உறவினருக்குத் திருமணம் செய்து வைக்கத் தீவிரமாக முயன்றுள்ளார். இதனால் அச்சமடைந்த காதல் ஜோடி, தங்களின் பாதுகாப்பிற்காகக் கேரளாவிற்குத் தப்பி வந்தனர்.
திருவனந்தபுரத்தில் உள்ள பூவார் பகுதியில் ‘நாகம்மா’ (Nagamma) என்ற மலையாளத் திரைப்படத்தின் படப்பிடிப்புக்காக மோனாலிசா வந்திருந்த போது, அவரது தந்தை அங்கு வந்து அவரை வலுக்கட்டாயமாக அழைத்துச் செல்ல முயன்றதாகக் கூறப்படுகிறது. இதனைத் தொடர்ந்து, மோனாலிசா மற்றும் ஃபர்மான் கான் இருவரும் தம்பானூர் காவல் நிலையத்தில் தஞ்சமடைந்தனர். அங்கு அவர்கள் அளித்த புகாரைத் தொடர்ந்து, போலீசார் விசாரணை நடத்தினர். மோனாலிசா 18 வயது பூர்த்தியானவர் என்பதை உறுதி செய்த போலீசார், அவர் தனது விருப்பப்படி வாழும் உரிமை உள்ளவர் எனத் தெரிவித்து, அவருக்குப் பாதுகாப்பு வழங்கினர்.
“6 month love with her is equal to 60 years” – Farman Khan, Monalisa’s husband.
போலீஸ் பாதுகாப்பிற்குப் பிறகு, படக்குழுவினரின் உதவியுடன் விழிஞ்ஞத்தில் உள்ள வரலாற்றுச் சிறப்புமிக்க அருமானூர் நாயினார் தேவர் கோவிலில் இவர்களது திருமணம் நடைபெற்றது. இந்தத் திருமணத்தில் கேரள கல்வி அமைச்சர் வி. சிவன்குட்டி (V. Sivankutty), மார்க்சிஸ்ட் கம்யூனிஸ்ட் கட்சியின் மாநிலச் செயலாளர் எம்.வி. கோவிந்தன் மற்றும் நாடாளுமன்ற உறுப்பினர் ஏ.ஏ. ரஹீம் உள்ளிட்ட முக்கியப் அரசியல் பிரமுகர்கள் கலந்து கொண்டு மணமக்களை வாழ்த்தினர். கேரளாவின் சமூக நல்லிணக்கத்திற்கு இந்தத் திருமணம் ஒரு சிறந்த உதாரணம் என்று அங்கு வந்திருந்த தலைவர்கள் குறிப்பிட்டனர்.
மோனாலிசா மற்றும் ஃபர்மான் கான் ஜோடி கடந்த ஒன்றரை ஆண்டுகளாக (18 மாதங்கள்) காதலித்து வந்ததாகத் தகவல்கள் தெரிவிக்கின்றன. பேஸ்புக் மூலம் தொடங்கிய இவர்களது நட்பு பின்னாளில் காதலாக மலர்ந்துள்ளது. தனது குடும்பத்தின் எதிர்ப்பையும் மீறி, சட்டப்பூர்வமாகத் தனது காதலரைத் தேர்வு செய்த மோனாலிசாவின் இந்த முடிவு சமூக வலைதளங்களில் விவாதங்களை ஏற்படுத்தியுள்ளது. அதே சமயம், ஆதரவற்ற நிலையில் கேரளா தங்களுக்குப் புகலிடம் அளித்ததாக மணமக்கள் நெகிழ்ச்சியுடன் தெரிவித்தனர்.
சினிமா வட்டாரத்தில், மோனாலிசா தற்போது மலையாளத் திரையுலகில் அறிமுகமாகி நடித்து வருகிறார். ‘நாகம்மா’ திரைப்படத்தின் படப்பிடிப்புத் தளத்தில் இருந்தே இந்தத் திருமணப் பிரச்சனைகள் தொடங்கியது, என்று கூறப்படுகிறது. எனவே, படக்குழுவினர் இவர்களுக்கு முழு ஆதரவு அளித்தனர். இந்தத் திருமண வீடியோக்கள் மற்றும் புகைப்படங்கள் தற்போது இணையத்தில் வைரலாகி வரும் நிலையில், பலரும் இவர்களது துணிச்சலான முடிவைப் பாராட்டி வருகின்றனர்.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
