தமிழ் சினிமாவில் முன்னணி இயக்குநர்களில் ஒருவரான ஹெச். வினோத், சமீபத்திய பேட்டி ஒன்றில் தேசிய விருதுகள் குறித்துப் பேசியுள்ள கருத்துகள் சமூக வலைதளங்களில் பெரும் விவாதத்தை ஏற்படுத்தியுள்ளன. தனுஷின் ‘ராயன்’ படத்திற்குச் சிறந்த திரைப்படத்திற்கான தேசிய விருது கிடைத்ததும், அதேவேளையில் ‘மகாராஜா’ மற்றும் ‘அமரன்’ போன்ற விமர்சன ரீதியாகவும் வசூல் ரீதியாகவும் மாபெரும் வெற்றி பெற்ற படங்கள் விருது பட்டியலில் விடுபட்டது குறித்தும் அவரிடம் கேள்வி எழுப்பப்பட்டது.
இதற்குப் பதிலளித்த ஹெச். வினோத், “இது ஒருவேளை தவறாக இருந்தால், அவர்கள் அடுத்த முறை அதனைச் சரி செய்ய வேண்டும். ஒரு சிறிய குழுவின் முடிவின் அடிப்படையில்தான் விருதுகள் வழங்கப்படுகின்றன. மேலும், நமது படங்களை தேசிய விருதுகளுக்குச் சரியாகப் பரிந்துரைப்பதோடு, குழு உறுப்பினர்கள் படத்தை முழுமையாகப் பார்த்தார்களா? என்பதைத் தொடர்ந்து பின்தொடர வேண்டும் (Follow-up). வெறும் நல்ல படம் மட்டுமே தேசிய விருதுக்குத் தகுதி பெற்றுவிடாது” என்று விளக்கமளித்துள்ளார்.
விருதுகள் வழங்கும் முறை மற்றும் திரைப்படங்களை முறையான வழிகளில் கொண்டு சேர்ப்பது குறித்து ஹெச். வினோத் வெளிப்படையாகப் பேசியுள்ள இந்த விஷயம் தற்போது கோலிவுட் வட்டாரத்தில் பேசுபொருளாகியுள்ளது. திரைப்படத் துறையில் சிறந்த படைப்புகளை உரிய இடத்திற்கு எடுத்துச் செல்வதில் லாபியிங் மற்றும் முறையான விழிப்புணர்வு எத்தகைய தாக்கத்தை ஏற்படுத்துகிறது என்பதை இது காட்டுவதாக சினிமா விமர்சகர்கள் விவாதித்து வருகின்றனர்.
