ஹாலிவுட் திரையுலகின் மாஸ்டர் கிராஃப்ட்மேன் கிறிஸ்டோபர் நோலன், தனது அடுத்த பிரம்மாண்ட படைப்பான ‘தி ஒடிஸி’ (The Odyssey) மூலம் மீண்டும் உலகத் திரையுலகை வியப்பில் ஆழ்த்தியுள்ளார். ஹோமரின் புகழ்பெற்ற காவியத்தை மையமாக வைத்து உருவாக்கப்பட்டுள்ள இந்தப் படத்தின் டிரெய்லர் இன்று (மே 5, 2026) அதிகாரப்பூர்வமாக வெளியிடப்பட்டுள்ளது. ‘ஓப்பன்ஹைமர்’ படத்தின் மாபெரும் வெற்றிக்குப் பிறகு நோலன் இயக்கியுள்ள படம் என்பதால், உலகெங்கிலும் உள்ள சினிமா ரசிகர்கள் மத்தியில் பெரும் எதிர்பார்ப்பு நிலவுகிறது.
இந்த ட்ரெய்லரில் ‘பேட்மேன்’ புகழ் ராபர்ட் பாட்டின்சன் மற்றும் ‘ஸ்பைடர்மேன்’ புகழ் டாம் ஹாலண்ட் ஆகியோரின் மிரட்டலான காட்சிகள் இடம்பெற்றுள்ளன. மேட் டாமன் கதையின் நாயகனான ஒடிசியஸாக நடிக்க, டாம் ஹாலண்ட் அவரது மகன் டெலிமாச்சஸாகவும், ராபர்ட் பாட்டின்சன் அந்தினோஸ் என்ற வில்லத்தனம் கலந்த கதாபாத்திரத்திலும் நடித்துள்ளனர். இதுமட்டுமின்றி ஜந்தாயா மற்றும் ஆனி ஹாத்வே போன்ற முன்னணி நட்சத்திரங்களும் முக்கிய கதாபாத்திரங்களில் நடித்துள்ளனர்.
நோலனின் டிரேட்மார்க் மேஜிக் இந்த டிரெய்லரில் அணு அணுவாகத் தெரிகிறது. சுமார் 250 மில்லியன் டாலர் பட்ஜெட்டில் உருவாகியுள்ள இந்தப் படம், முழுமையாக ஐமேக்ஸ் (IMAX) கேமராக்களால் படமாக்கப்பட்டுள்ளது. டிரெய்லரில் வரும் கிரீக் காலத்து போர்க்களக் காட்சிகள் மற்றும் பிரம்மாண்டமான விஷுவல்கள் ரசிகர்களுக்கு ஒரு புதிய உலகத்தைக் கண்முன் நிறுத்துகின்றன. குறிப்பாக ஹோமரின் காவியத்தில் வரும் ‘சைக்ளோப்ஸ்’ (ஒற்றைக்கண் அரக்கன்) தொடர்பான காட்சிகள் இணையத்தில் பயங்கர வைரலாகி வருகின்றன.
இந்தப் படம் வரும் ஜூலை 17, 2026 அன்று உலகம் முழுவதும் திரையரங்குகளில் வெளியாகவுள்ளது. ஹாலிவுட்டின் இரண்டு மிகப்பெரிய சூப்பர் ஹீரோ நடிகர்கள் ஒரே படத்தில் நோலன் இயக்கத்தில் இணைந்திருப்பது, இந்தப் படத்திற்கான வசூல் வேட்டையை இப்போதே உறுதி செய்துவிட்டது. நோலனின் முந்தைய படங்களைப் போலவே, இதிலும் கால வரிசை மாற்றப்பட்ட திரைக்கதை (Non-linear storytelling) இருக்கும் என்று எதிர்பார்க்கப்படுவதால், சினிமா ஆர்வலர்கள் மிகுந்த ஆவலுடன் காத்திருக்கின்றனர்.
