சமூக வலைதளங்களில் தற்போது எங்கு பார்த்தாலும் ஆரா பத்துக்கு பத்து... என்ற பாடலும், அதற்கான துள்ளலான நடன அசைவுகளும் தான் ஆக்கிரமித்து வருகின்றன. இந்தப் பாடலுக்கு நடிகை கெட்டிகா சர்மா ஆடியுள்ள நடன அசைவுகள் இளைஞர்கள் மத்தியில் மிகப்பெரிய அளவில் ‘டிரெண்டிங்’ ஆகி வருகிறது. பலரும் அந்த சிக்னேச்சர் ஸ்டெப்களைப் போட்டு ரீல்ஸ் வீடியோக்களை வெளியிட்டு இணையத்தை அதிர வைத்து வருகின்றனர்.
தனது நடனம் இந்த அளவிற்கு வரவேற்பைப் பெற்றுள்ளது குறித்து நடிகை கெட்டிகா சர்மா நெகிழ்ச்சியுடன் அறிக்கை ஒன்றை வெளியிட்டுள்ளார். அதில் அவர் கூறியிருப்பதாவது:
திறமையைக் கொண்டாடும் தமிழ் ரசிகர்கள்
“தமிழ் சினிமா ரசிகர்கள் உண்மையிலேயே பெருமைக்குரியவர்கள். மொழி பாகுபாடு எதையும் பார்க்காமல், திறமையான அத்தனை கலைஞர்களையும் தேடித் தேடி கொண்டாடித் தீர்ப்பதில் அவர்கள் வல்லவர்கள். ஒரு நல்ல விஷயத்தை அல்லது திறமையை அங்கீகரிப்பதில் தமிழ் ரசிகர்களுக்கு நிகர் அவர்களே.”
“நான் போட்ட நடன அசைவுகளை ரசித்து, அதனைப் பின்பற்றி பலரும் ரீல்ஸ் வீடியோக்கள் வெளியிடுவதைப் பார்க்கும்போது மிகவும் மகிழ்ச்சியாக இருக்கிறது. ஒரு கலைஞருக்கு இதைவிடப் பெரிய அங்கீகாரம் எதுவும் இருக்க முடியாது. தமிழ் சினிமாவில் நடித்தது எனக்கு எப்போதும் பெருமையான ஒரு விஷயம்” என்று அவர் தெரிவித்துள்ளார்.
சமீபகாலமாக தமிழ் சினிமாவில் அறிமுகமாகும் பிற மொழி நடிகைகளுக்கு ரசிகர்கள் மத்தியில் நல்ல வரவேற்பு கிடைத்து வருகிறது. அந்த வரிசையில், கெட்டிகா சர்மா தனது கடின உழைப்பாலும் நேர்த்தியான நடனத்தாலும் ரசிகர்களின் கவனத்தை ஈர்த்துள்ளார். இவரது இந்தப் பாராட்டு தற்போது தமிழ் சினிமா வட்டாரத்தில் வைரலாகி வருகிறது.
கிரிஷ். இவர் டிஜிட்டல் செய்தி துறையில் துறையில் 5 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள செய்தி பிரிவில் பணியாற்றிய அனுபவம் கொண்டவர். சினிமா, விளையாட்டு சார்ந்த செய்திகள் வழங்குவதில் ஆர்வம் உள்ளவர்.
