தமிழ் சினிமாவில் தனித்துவமான கதைகளைத் தேர்ந்தெடுத்து நடித்து வரும் நடிகர் கிருஷ்ணாவின் திரைப்பயணத்தில் மிக முக்கியமான மைல்கல்லாக அமைந்துள்ள அவரது 25வது திரைப்படத்தின் அதிகாரப்பூர்வ தலைப்பு மற்றும் தோற்றங்கள் வெளியாகியுள்ளன. இப்படத்திற்கு ‘மர்டர் இன் டவுன்’ (Murder In Town) என பெயரிடப்பட்டுள்ளது. பிரபல இயக்குநர் கார்த்திக் சுப்பராஜ் தனது சமூக வலைதளப் பக்கத்தில் இப்படத்தின் ஃபர்ஸ்ட் மற்றும் செகண்ட் லுக் போஸ்டர்களை வெளியிட்டு படக்குழுவினருக்கு வாழ்த்துக்களைத் தெரிவித்துள்ளார்.
View this post on Instagram
புதுமுக இயக்குநர் பாலகிருஷ்ணன் எழுத்து இயக்கத்தில் உருவாகும் இப்படம், ஒரு தீவிரமான மற்றும் திருப்பங்கள் நிறைந்த துப்பறியும் கிரைம் த்ரில்லர் கதையாக உருவாகி வருகிறது. வெளியாகியுள்ள ஃபர்ஸ்ட் லுக் போஸ்டரில் நடிகர் கிருஷ்ணா ‘என். அதியமான்’ என்ற காவல் அதிகாரியாக மிகவும் இன்டென்ஸ் ஆன தோற்றத்தில் காணப்படுகிறார். மேலும், மற்றொரு போஸ்டரில் அவர் ஒரு குற்றச் சூழலில் (Crime Scene) நடமாடும் காட்சியும், விசாரணைக் களத்தை பிரதிபலிக்கும் வகையில் சிதறிய தடயங்கள் மற்றும் இரத்தக் கரைகளுடன் கூடிய கோப்புகளும் இடம் பெற்றுள்ளன. இது வழக்கமான துப்பறியும் கதைகளை விட முற்றிலும் மாறுபட்ட கோணத்தில் இருக்கும் என்ற ஆர்வத்தைத் தூண்டியுள்ளது.
View this post on Instagram
ஶ்ரீ விஷ்ணு கிரியேஷன்ஸ் மற்றும் மனு மந்த்ரா கிரியேஷன்ஸ் தயாரிப்பில் உருவாகும் இப்படத்தில், கிருஷ்ணாவுடன் இணைந்து பிந்து மாதவி கதாநாயகியாக நடிக்கிறார். மேலும் இவர்களுடன் பாலா சரவணன், வைபவ் முருகேசன், ஆர். பாண்டியராஜன், சின்னஜெயந்த், ஐ.எம். விஜயன், சரவணன், கஜராஜ் மற்றும் பல முன்னணி நட்சத்திரங்கள் முக்கிய கதாபாத்திரங்களில் நடிக்கின்றனர். விறுவிறுப்பான த்ரில்லர் ஜானரில் உருவாகி வரும் இப்படம் கோலிவுட் வட்டாரத்தில் மிகப்பெரிய எதிர்பார்ப்பை ஏற்படுத்தியுள்ளது.
